د ریاست الوزرا اقتصادي مرستیالۍ وایي، د ملي تدارکاتو کمیسیون له لوري د منظور شویو پروژو په قراردادونو کې شاوخوا ۳ میلیارده افغانۍ سپما شوې دي.
اقتصادي مرستیالۍ په یوه خبرپاڼه کې ویلي، د ملي تدارکاتو کمیسیون تر اوسه ۳۱۷ لویې او کوچنۍ پروژې چې، ټولټال ارزښت یې شاوخوا ۸۵ میلیارده افغانۍ کېږي منظور کړې دي.
د اقتصاد وزارت په تړونونو کې سپما او د بیخ بنایي پروژو پلي کول د اسلامي امارت له لومړیتوبونو ګڼي.
د اقتصاد وزارت مسلکي مرستیال، عبداللطیف نظري و ویل: « په پروژو او قرادادونو کې سپما د بودیجې د جبران، د نویو پروژو د پیل، د فساد کمولو او د اقتصادي پرمختګ په برخه کې مرسته کوي.»
له دې سره سم، د سوداګرۍ او پانګونې خونه د سرپرست حکومت له لوري په قراردادونو او پروژو کې سپماوې د هېواد د اقتصاد د ودې لپاره ګټورې ګڼي.
د سوداګرۍ او پانګونې خونې د مدیره پلاوي غړی خان جان الکوزی وایي: « که دولت سپما وکړي او د بې ځایه لګښتونو مخنیوی وکړي، دا ګام د هېواد په ګټه دی. ځکه له دغو سپما شویو په نویو پروژو کې ګټه اخیستل کیدایشي. سپما اړینه ده او باید ترسره شي.»
د ریاست الوزرا اقتصادي مرستیالۍ د مالوماتو لمخې، هغو پروژو کې چې ځینې یې بشپړې شوې او پر ځینو یې لا هم کار روان دی، نه یوازې د هېواد پرمختګ ته لار هواره شوې بلکې د سلګونو کسانو لپاره کاري زمینه هم برابره شوې ده.