د کانونو او پټرولیم وزارت وایي، هیواد کې یې د زېربنایي پروژو د پلي کولو په موخه نږدې ۲۰ کانونه بېلابېلو شرکتونو ته سپارلي دي.
د دغه وزارت ویاند ټینګار کوي چې په دې کانونو کې سره زر، د ډبرو سکاره، سرب او جست، کرومایټ او نیفرایټ شامل دي او د قوشتیپې کانال په څېر د سترو پروژو تمویل لپاره ځانګړي شوي دي.
د کانونو او پټرولیم وزارت ویاند، همایون افغان و ویل: «د بېلابېلو منرالونو شاوخوا ۲۰ کانونه په ځانګړې توګه د سرب او جستو، سرو زرو، کرومایټو او نفرایټو کانونه د زېربنایي او عامه المنفعه پروژو په بدل کې ورکول شوي، البته د دغو کانونو عواید ځینو عام المنفعه پروژه ته ځانګړي شوي دي.»
ځینې کارپوهان افغانستان سره د نړۍوالو مرستو کمښت او د ځینو پروژو بې برخلیک حالت ته په پام سره، د بېخ بنایي پروژو د تمویل لپاره د کانونو ځانګړي کېدل د هېواد د اقتصادي ودې لپاره مهم ګڼي.
د اقتصادي چارو شنونکي، عبدالنصیر رښتیا طلوعنیوز ته و ویل: «هره پروژه چې پلي کیږي، په پایله کې یې خلکو ته کاري زمینې رامنځته کیږي. که د هېواد کانونه د پراختیایي او بنسټیزو پروژو د تمویل په بدل کې په قرارداد ورکړل شي، کولای شي بنسټونه جوړ او خلکو ته دوامداره عواید برابر کړي.»
د سرپل د بلخاب حوزې د ډبرو سکرو کېندنه هم د قوشتیپې کانال د جوړولو د لګښتونو پوره کولو لپاره د ملي پراختیا شرکت ته ځانګړی شوی دی.
په دې اړه مو اندونه