د برېښنا شرکت وایي تمه ده ترراتلونکو درېیو ورځو په بغلان ولایت کې د برېښنا وېجاړه شوې ستنه د رغولو چارې بشپړې شي.
د دغې شرکت مسوولین وایي چې په دغې کار سره به په پلازمېنه کابل کې د برېښنا ستونزه له منځه لاړه شي.
د دغې اداري ویاند وایي چې تراوسه هم کابل ښار ته لېږدول شوې برېښنا څخه سل کیلواټه یې پرې شوې ده.
د برېښنا شرکت د ویاند په خبره، د دغې پایلې د برېښنا په نښلولو سره د کابل د اوسېدونکو برېښنا به ۲۴ ساعته شي.
د برېښنا شرکت ویاند وحید الله توحیدي په دې اړه وویل:«زموږ همکاران د ورځې پر سیستم کار کوي او ټاکول شوې ده تر راتلونکو درې ورځو د ستنې د رغونې کار بشپړ شي.»
بلخوا د پلازمېنې یو شمېر اوسېدونکي پرحکومت د نیوکې سره وایي، چې امنیتي ځواکونه باید د برېښنا پایو امنیت خوندي کړي.
د پلازمېنې د څرخي پله په سیمه کې د تولیدي کار خونو مالکان وايي چې په وروستۍ اوونۍ کې د برېښنا نشتوالي له کبله يي ۸۰ سلنه تولید کم شوی دی.
د یوې کارخونې د بازار موندنې د برخې مدیر محمد هارون تسل په دې اړه وویل:« په دغه شرکت کې کابو ۳۰ تنه کار کوي. موږ هغوی ته تنخواه ورکوو؛ کهچېرې برېښنا منظمه نه وي، د دوی تنخواه هم یو زیان دی او بله دا چې د دولتي برېښنا په نشتوالي کې اړ یو چې جنراټور ولګوو چې ډېر لګښت لري.»
دغه څرګندونې په داسې حال کې مطرحه کېږي چې وسلهوالو طالبانو شپږ ورځې مخکې له تاجیکستان او ازبیکستان څخه پلازمېنې ته د وارداتي برېښنا یوه پایه د بغلان په کیله ګي سیمه کې په بمونو والوځوله چې د دې پېښې له امله پر پلازمېنې برېښنا پرې شوه.