هرات کې پر تلاسیمیا ناروغۍ د اخته ماشومانو د درملنې ځانګړی روغتون ګټې اخیستنې ته وسپارل شو.
د عامه روغتیا وزارت د دغه روغتون د پرانیستې پرمهال ویلي، هېواد کې ډېر شمېر ماشومان د وینې سرطان په ناروغۍ اخته دي او دغه روغتون تجهیز ته جدي اړتیا لري.
دغه روغتون د نږدې پنځه سوه زره امریکايي ډالرو په لګښت د ځینو ملي پانګوالو او شتمنو له لوري جوړ شوی دی.
د عامې روغتیا وزارت سرپرست و ویل: «تلاسیمیا یوه جینیټیکي ناروغي ده. زموږ هېوادوال په ټول هېواد کې د دې ناروغۍ له امله کړیږي.»
دغه څلور پوړیزه روغتون د جوړولو چارې دوه کاله وړاندې پیل شوې وې چې یوه د عملیات خونه او وړکتون هم لري.
د هرات د سوداګرۍ او پانګونې خونې رییس، یونس قاضي زاده و ویل: «دغه روغتون د نړۍوالو معیارونو سره سم د سلو بسترونو په ظرفیت جوړ شوی دی. د ودانۍ کار یې پرمختګ کړی او د تجهیز، درملنې او بې وزلو ماشومانو د پالنې برخه کې خصوصي سکټور تل له خلکو سره ولاړ دی او په راتلونکي کې به هم د عامې روغتیا وزارت او د افغانستان له خلکو سره همکار وي.»
د خصوصي سکټور مسوولین وايي، هڅه کوي چې د عامې روغتیا وزارت او سوداګرو په همکارۍ دغه روغتون ته د اړتیا وړ امکانات او تجهیزات برابر کړي.
په لویدیځه حوزه کې د تلاسیمیا څانګې مسوول، اصف رحماني و ویل: «د دې روغتون د تجهیز په برخه کې خیریه بنسټونو موږ سره ژمنې کړي او موسساتو هم ژمنه کړې چې همکاري به کوي. د تلاسیمیا ناروغیو ماشومانو لپاره یوازینۍ حل لار د هډوکي د مغز پیوند دی. پر دې سربېره، ماشومان به دلته مدیریت شي، د اوسپنې کچه به یې کنټرول شي، په ټاکلي وخت به وینه ورکړل شي او یو لوی ګام چې غواړو واخلو دا دی چې د هډوکي مغز د پیوند عملیات له لارې د دې ماشومانو ژوند وژغورو.»
د هرات د عامې روغتیا ریاست پر تلاسیمیا ناروغۍ اخته څلور سوه ناروغ ماشومان ثبت کړي چې د هرات په حوزوي روغتون کې په پرلپسې ډول تر درملنې لاندې دي.
د روغتیاپالانو په خبره، په تلاسیمیا ناروغۍ اخته ماشومان په اوونیز ډول وینه ترلاسه کوي او خلک په ورځني ډول دغو ناروغانو ته وینه ورکوي.
په دې اړه مو اندونه