افغان حکومت د امریکا متحده ایالاتو او ایران ترمنځ ستونزو ته په اشارې وایي د سیمې او نړۍ هېوادونو لخوا د افغان سولې بهیر په تړاو نړیواله اجماع باید پر ځای پاتې شي.

د سولې په چارو کې د دولت وزارت وایي، کابل هیله لري د افغان سولې په تړاو چې کومه نړیواله اجماع جوړه یوازې دا نه چې وساتل شي بلکي باید پراخه هم شي.

د تهران او واشنګټن ترمنځ د کړکیچ له زیاتوالي وروسته، په افغانستان کې دا انديښنه څرګندیږي چې ښايي دا جنجالونه د افغانستان د سولې مخه ونیسي او هغه اجماع چې په سیمه او نړۍ کې د افغان سولې په اړه رامنځته شوې وه زیانمنه کړي.