د هېواد د فوټبال ښځينه لوبغاړو غوره لیګ څلورم پړاو سیالیو په لړ کې نن یکشنبې (د تلې په ۲۰مه) د هرات او جوزجان د نجونو لوبډلو د لوبې ډګر ته ودانګل.
د نجونو د فوټبال د غوره لیګ د څلورم پړاو سیالیو په لړ کې د هرات د نجونو د فوټبال لوبدلې ۹ پر صفر د جوزجان د نجونو د فوټبال لوبډلې ته ماتې ورکړه.
په دغې لوبه کې فاطمې حیدري د هرات نجونو لوبډلې لپاره پنځه، عادلې محمدي دوه، سوسن محمدي او هما کریمي هم یو یو ګولونه ترسره کړل.
په دې توګه د هرات لوبډلې د دې لوبې په ګټولو سره د خپلو امتیازونو شمېر شپږو ته ورسوه او د نیمه وروستي پړاو مخکښه لوبډله شوه.
د بامیان لوبډلې هم د درېیو امتیازونو په ترلاسه کولو سره د دویمې لوبډلې په توګه نیمه وروستي پړاو ته لاره ومونده.
سبا د دغو سیالیو د ډله یز پړاو په پایلوبه کې د کابل د نجونو لوبډله د غور د لوبډلې پر وړاندې د لوبې ډګر ته ولاړه شي.
