د اسیا ملتونو او نړیوال جام مقدماتي فوټبال سیالیو کې له عمان او بنګله دیش سره د افغانستان د لوبو نېټه اعلان شوه.
د اسیا فټبال کنفدراسیون تېره ورځ(سې شنبې د مرغومې په ۱۶مه نېټه) اعلان کړی چې د روان زږدیز کال د مارچ په ۲۵مه نېټه به بنګله دیش د سیلهت لوبغاړي کې د افغانستان کوربه وي.
ټاکل شوې دا لوبه د افغانستان په وخت له غرمې وروسته ۵:۳۰ بجې پیل شي.
همداراز د افغانستان بله لوبه به له عمان هېواد سره د مارچ میاشتې په ۳۰مه نېټه ترسره شي.
د افغانستان د فټبال فدراسیون وايي چې له عمان سره د لوبې وخت او ځای نه دی ټاکل شوی.
د یاد فدراسیون د مالوماتو له مخې د نړۍ او سیمې هېوادونو کې د کرونا ویروس له کبله رامنځه شوي حالت ته په کتو، د اسیا فتبال کنفدراسیون سره به په همغږۍ له عمان سره د لوبې وخت او ځای څرګند شي.
افغانستان د امنیتي مشکلاتو له کبله نشي کولی چې خپلې لوبې په کور د ننه ترسره کړي او مخکې له دې یې په تاجکستان کې ت رسره کولې.
د افغانستان لوبډلې د تمرین کمپ
مخکې له دې افغانستان د مرغومې میاشتې په شپږمه نېټه دوبۍ کې تمرینۍ کمپ پیل کړی و.
یو شمېر لوبغاړي چې افغانستان کې د ننه ژوند کوي، نه دي توانیدلي چې د کرونا ویروس محدودیتونو له کبله په دغه کمپ کې ګډون وکړي.
خو د افغانستان د فوټبال ملي لوبډلې، روزونکي، انوش دستګیر ویلي دي هغه لس لوبغاړي چې د افغانستان فټبال غوره لیګ کې ښه ځلیدلي وو، ملي لوبډلې ته اضافه کړي دي.