په ولسي جرګه کې یو شمېر استازي په هغو ناامنیو ولایتونو کې چې د ټاپي د غازو نل لیکه له هغې څخه تېرېږي وايي چې د دغې پروژې د امنیت په ټينګښت کې د سیمې اوسېدونکو شاملول او هغوی ته د کار لپاره د زمنینو برابرول کولای شي په افغانستان کې د ټاپي پروژې په عملي کېدو کې ګټور وي.
د ورکړل شویو مالوماتو له مخې د تاپي پروژې په چوکاټ کې د ترکمنستان د ګازو د نل لیکې څه د پاسه ۷۵۰ کیلومتره د هرات له کُشک ولسوالۍ څخه پیل او د دغه ولایت له انجیل، ادرسکن او شینډنډ ولسوالیو د فراه بالابلوک او بکوه ته رسېږي او له هغه ځایه د هلمند له واشیر او نهرسراج ولسوالیو د کندهار ولایت میوند، ژېړۍ، ارغنداب، دامان او سپين بولدک ولسوالیو ته او له هغې وروسته د پاکستان کوټې ښار ته غځول کېږي.
ویل کېږي د هېواد ډېری ولسوالۍ چې د تاپي پروژه پکې عملي کېږي له ډېرو کلونو راهیسې ناامنې دي.
د کندز د خلکو استازي لالي حمیدزي په دې اړه وویل:"حکومت باید د دغې پروژې د امنیت د ټينګښت لپاره هڅې وکړي او موږ هیله من یوو کهچېرې د دغې پروژې د امنیت د ټينګښت لپاره لازم پروګرامونه په لاس کې ونیول شي،دغه پروژه عملي کېږي او له شک څخه پرته دا د هېواد به ګټه دی".
د هرات د خلکو استازي خلیل احمد شهیدزاده په دې اړه څرګنده کړه: "حکومت باید دغه پروژه حکومتي نه کړي،بلکې هغه ولسي کړي او په بېلابېلو ولایتونو کې د قوم د مشرانو په مرسته او په دغې پروژه کې د خلکو ته د کار لپاره د زمینې برابرول دغه پروژه عملي کوي".
له بلخوا ویل کېږي چې د ترکمنستان د غازو د نل لیکې یوه برخه چې په افغانستان کې تېرېږي د کندهار هرات د لویې لارې ترڅنګ د پاکستان تر پولې پورې غځول کېږي.
د کورنیو چارو وزارت مسوولین وايي ددې پروژې د امنیت د ټینګښت لپاره لازم چمتووالی لري.
د کورنیو چارو وزارت ویاند صدیق صدیقي په دې اړه زیاته کړه: "له شک څخه پرته دا پروژه ملي ده،حکومت هر هغه څه چې په واک کې لري د هغې د تأمین لپاره به هڅه وکړي او په دې برخه کې موږ له وړاندې خپرونې لرلې دي او د هغې لپاره مو چمتووالی نیولی دی".
د تاپي پروژې عملي کار چې څو ورځې مخکې پيل شو څه د پاسه ۷۵۰ کیلومتره یې د افغانستان په خاوره کې تېرېږي او د دې پروژې په عملي کېدو سره په هېواد کې د څه د پاسه ۱۲۰ زره کسانو لپاره د کار د زمینې پر برابرولو سربېره به په کال کې تر ۵۰۰ مېلیون ډالرو افغانستان ته د ګازو د لېږد د ترانزیت د حق په توګه ورکړل شي.
د دغې پروژې په عملي کېدو سره به افغانستان تر ۳۰ کلونو پورې یو میلیارد او ۵۰۰ مېلیون مترمکعبه ګاز په مناسبه بیه وپېري او د ترکمنستان د ګازو نل لیکې په جوړېدو سره په اوږده موده کې افغانستان له خپلو کورنیو زیرمو راایستل شوی ګاز په دغه نل لیکه کې پر هند وپلورلاي شي.