د تېرو لسو ورځو راهیسې، د ایران بېلابېلو سیمو او په ځانګړې توګه خوزستان ایالت کې د اوبو د کمي له کبله، خلکو لاریونونه روان کړي او د تېرې شپې راهیسې، انټرنیټ او برېښنا هم پرې شوې.

د ایران مذهبي مشر علي خامنه‌یي وایي، په ایران کې د اوبو د کمي له کبله د زرګونه خلکو لاریون د هغوی حق دی.

خامنه‌يي وایي، که په خوزستان ایالت کې د اوبو د کمي له کبله غوښتنو او سپارښتنو ته پاملرنه شوې وای، اوس به خلک سړکونو ته نه راوتل.

د تېرو لسو ورځو راهیسې، د ایران بېلابېلو سیمو او په ځانګړې توګه خوزستان ایالت کې د اوبو د کمي له کبله، خلکو لاریونونه روان کړي او د تېرې شپې راهیسې، انټرنیټ او برېښنا هم پرې شوې.

ډېر لاریونونه په اهواز، سوسنګرد، شادګان، حمیدیه، شوش او ماه‌شهر کې دي او امنیتي ځواکونه او په ځانګړې "سپاه‌پاسداران" د امنیت لپاره ورغلي دي.

رپوټونه دي، چې په ځینو هغو ایالتونو کې برېښنا پرې شوې، چې د تودوخې درجه په‌کې ان تر ۴۸ درجو رسېږي.

د ایران مذهبي مشر علي خامنه‌يي ویلي:"یو ځل بیا د ایران ملت او مسوولینو ته یادونه کوم، چې په هره موضوع کې باید په خپلو پښو ودرېږو او پر نورو تکیه کول ستونزې جوړوي."

د ایران مذهبي مشر ته چې د کورونا ضد واکسینو دویم ډوز هم تطبیق شوی، پر ځان بسیاینه کې ټینګار کړی.

ښاغلي خامنه‌يي ویلي:"که مو په خوزستان ایالت کې د اوبو کمي په هکله، د اهواز او خوزستان فاضلاب په هکله، سپارښتنو ته پاملرنه کړې وای، نو اوس به دا ستونزې نه وې."

ایران کې اوسنیو لاریونونو په لړ کې د ۴ لاریونوالو او د یوه امنیتي کس د وژنې رپوټونو هم شته.