د لوېدیځ او ایران د اټومي تړون پر بیاځلي خبرو په هکله د لوېدیځ د خبرداریو سره سره، د ملګرو ملتونو د اټومي انرژۍ نړۍوال سازمان پرون په یوه رپوټ کې ویلي، چې: ایران د فلزي یورانیمو بډایه کولو کې پرمختګ کړی دی.
د ۲۰۲۱ کال د اګېسټ په ۱۴ مه د اټومي انرژۍ نړۍوال اژانس د دې پخلی وکړ، چې "ایران ۲۵۷ ګرامه یورانیم کارولي، چې ۲۰۰ ګرامه فلزي یورانیم پرې تولید کړي. دا په څلورو پړاوونو کې د ایران درېیم پړاو وو."
د ایران دا ګام د امریکا او د اروپا درېیو ځواکمنو هېوادونو غوسه راپارولې، ځکه چې په وینا یې دغسې حرکتونه د اټومي بم جوړولو ته لار برابرولی شي.
ایران بیا ټینګار کړی، چې موخې یې په پوره توګه سولهییزې دي او اوسمهال د راکټور تېلو د نوې بڼې پراختیا په حال کې دي.
په همدې حال کې د امریکا بهرنیو چارو وزارت ویاند نېډ پرایس ویلي:"ایران د فلزي یورانیمو تولید ته اړتیا نهلري، چې د اټومي وسلو پراختیا سره نېغه اړیکه ولري."
پرایس دا هم ویلي:"ایران باید اټومي ترینګلتیاوې بندې کړي او د اټومي تړون عملي کولو لپاره دې مذاکراتو ته کېني."