د عراق په بصرې ښار کې یو شمېر قهرېدلي اعتراضکوونکو د ایران کنسلګرۍ او یو شمېر دولتي بنسټونو ته اور اچولی دی.
دا اعتراض کوونکي پر عراق د ایران پر نفوذ ، د ژوند حال خرابېدو او د کار پر نشتوالي نیوکې لري.
ایران د اعتراض کوونکو دا کار غندلی دی.
په داسې حال کې چې د عراق حکومت د ملکي کسانو د ژوند پر خوندیتوب ټینګار کوي، خو په اعتراضونو یو اعتراض کوونکی وژل شوی او یو شمېر ټپیان دي.
د عراق لومړي وزیر، پوځي سلاکار،خالدالخز علي ویلي دي:«پر اعتراض کوونکو به ډزې نه کيږي او موږ داسې حالاتو ته اړینې تابیاوې نیسو، ځکه چې د اعتراض کوونکو ژوند ارزښت لري.»
په همدې حال کې د بصرې اعتراض کوونکو سره د بغداد اوسېدونکي هم همغږي شوي دي او د دوی ملاتړ په موخه سرکونو ته راوتلي دي.
اعتراض کوونکې، احلام العبیدي څرګندوي:«د خلکو پاڅون دوام لري. موږ له نړیوالې محکمې او ملګرو ملتونو غوښتنه کوو چې فاسد کسان مجازات کړي. موږ د دوی تېښته نشو منلی او دوی باید حساب ورکړي.»
د عراقیان له میاشتو راهیسې د ژوند حالات خرابوالي، د نا امنیو او کارنشتوالي شکایت لري.