رویټرز خبري اژانس خبر ورکړی چې امریکا متحده ایالاتو کې د کرونا ویروس د قربانیانو شمېر له ۱۴۰ زرو اوښتی دی.
د راپور له مخې چې نن(یکشنبې د چنګاښ په ۲۹مه نېټه) خپور شوی په کې راغلي دي، هره اوونۍ امریکا کې د کرونا ویروس کابو ۵ زره مثبتې پېښې ثبتیږي.
امریکا اوس مهال د کرونا ویروس د اخته کسانو شمېر له پلوه نړۍ کې تر ټولو بد هېواد دی.
د یاد هېواد ګاونډي کاناډا کې د یاد ویروس له کبله ۸۸۰۰ تنه مړه شوي دي.
د امریکا په ۵۰ ایالاتونو کې د کرونا ویروس خپور شوی دی، په داسې حال کې چې مخکې له دې یوازې له ۴۳ ایالاتونو د کرونا د مثبتو پېښو راپور ورکول کېده.
یوازې تېره اوونۍ امریکا کې د ۵۶۰۰ کسانو له مړینې خبر ورکړل شو. په داسې حال کې چې سویدن کې د کرونا ویروس د خپرېدو راهیسې په دې اندازه کسان مړه شوي دي.
اوس مهال نړۍ کې د کرونا ویروس د مثبتو پېښو شمېر له ۱۴ میلیونو او ۲۸۸ زرو اوښتی دی او همداراز له ۶۰۲ زرو ډېر مړه شوي دي.