د رویترز خبري اژانس د راپور له مخې چې تېره ورځ(دوشنبې د غبرګولي په ۲۶مه نېټه) خپور شوی، وايي چې نړۍ کې د کرونا ویروس د مثبتو پېښو شمېر له ۸ میلیونو اوښتی دی.
د راپور له مخې امریکا متحده ایالات د کرونا وروس د اخته کسانو له پلوه په سر کې دی چې په کې له دوو میلیونو ډېر کسان په کرونا ویروس اخته شوي ديږ
امریکا کې د کرونا ویروس له کبله تر اوسه ۱۱۶ زره ډېر کسان مړه شوي هم دي.
اوس مهال لاتینې امریکا کې د کرونا ویروس مثبتې پېښې مخ په زیاتېدو دي او د نړۍ د نورو هېوادونو پرتله ورځ تربلې په کې ډېرې پېښې ثبتیږي.
د رویټرز خبري اژانس وايي چې او سمهال نړۍ کې د کرونا ویروس د قربانیانو شمېر له ۴۳۴ زرو کسانو اوښتی دی.
د راپور له مخې وروستیو اوونیو کې د اخته کسانو شمېر دوه برابره زیات شوی دی.
د امریکا او چین په څېر هېوادونو کې پر تګ راتګ بندیزونو هم لیري شوي دي، خو دغه هېوادونه لا هم له کرونا ویروس سره د مبارزې په حال کې دي او هره ورځ مثبتې پېښې ثبتوي.
په همدې حال کې وروستیو ورځو کې په بیجینګ کې د کرونا ویروس مثبتې پېښې مخ په زیاتېدو دي.