یوه ځانمرګي بریدګر چې هوډ یې درلود د  نیمروز پر والي محمد قاسم خالد برید ترسره کړي، موخې ته تر رسېدو مخکې د والي د ساتوونکو له خوا پرې ډزې وشوې چې د هغه په پایله کې چاودېدونکو توکو یې هم چاودنه وکړه.

د نیمروز د ځايي چارواکو په وینا، په دغې پېښه کې محمد قاسم خالد ته زیان نه‌دی رسېدلی؛ خو درې تنه امنیتي ځواکونه ټپيان شوي دي.

محمد قاسم خالد په دې هکله وویل:«مخکې له دې نه چې دی خپل ځان ته انفجار ورکړي، له موږ سره چې کوم قهرمان مجاهدین او غازیان وو، د هغوی په ډزو کې بریدګر ووژل شو، بیا طبعاً هغه انفجاري توکي چې له ده سره و، هغو ته هم چاودنه ورکړل شوه.»

د چارواکو په وینا دا برید له غرمې وروسته یوه بجه هغه مهال رامنځته شو، چې مراجعین د ولایت له ودانۍ وتلي وو. 

ځانمرګی بریدګر له دوو پلټن‌ځایونو په تېرېدو، ځان د ولایت ودانۍ ته رسولی و.  

د نیمروز امنیه قومندانۍ ویاند ګل محمد قدرت په دې هکله وايي:«تقریبا یوې بجه شاوخوا ولایت مقام ته نږدې یو کس چې غوښتل یې والي صاحب ته ځان ورسوي، الحمدالله د امنیتي ځواکونو له خوا د ولایت مقام ته نږدې په ډزو ووشتل شو، وروسته تر هغې یې ځان ته انفجار وکړ.»

دغه ځانمرګي برید د نیمروز ولایت د اوسېدونکو اندېښنې زیاتې کړې دي. د نیمروز اوسېدونکي له امنیتي بنسټونو غواړي، چې دغه ولایت کې امنیتي تدابیر زیات کړي.

د نیمروز اوسېدونکی خیرالله طلوع‌نیوز ته وايي:«دوه تر درې کاله کېږي چې ارامي وه، اوس د خلکو اندېښنه زیاته شوې، باید امنیت ونیول شي.»

د نیمروز اوسېدونکی غلام دستګیر هم څرګندوي:«هغوی هم له انسانیته لېرې دي او هم له اسلامیته.»

تر اوسه د دغه برید پړه هېڅ ډلې پر غاړه نه‌ده اخیستې.

دا برید داسې مهال کېږي، چې تېر کال یوه ځانمرګي بریدګر ځان د بلخ والي تر دفتر رسولی و، چې په پایله کې یې د بلخ د والي په ګډون درېیو کسانو ژوند بایلود او څلور نور ټپیان شول.