ملګرو ملتونو په یوه تازه راپور کې ویلي چې د هرات ولایت له زلزله ځپلو سره د مرستو لپاره څه باندې څلور سوه میلیونه ډالرو ته اړتیا لري.
د ملګرو ملتونو، اروپایي ټولنې، نړۍوال بانک او د اسیا پراختیایي بانک ګډه ارزونه ښيي چې د هرات په زلزله ځپلو سیمو کې استوګنیزو کورونو، کرنې او ښوونې او روزنې بهیر ته سخت تاوان رسیدلی دی.
د دغې غوښتل شوې بودیجې ۴۱ سلنه، زلزله ځپلو کورنیو ته د سرپناه د جوړولو لپاره ځانګړې شوې ده.
د هرات د اطلاعاتو او کلتور رییس، احمدالله متقي وویل: « ملګرو ملتونو تر دې مهاله دوی لپاره کوم کور نه دی جوړ کړی او موږ هیله لرو چې دوی د خپل پلان سره سم هلته کورونه جوړ کړي.»
د ملګرو ملتونو په دغه راپور کې راغلي چې نږدې پنځه میاشتې مخکې هرات کې مرګونې زلزلې، د ښوونې او روزنې په برخه کې ۱۸۰زره زده کوونکي او نږدې څلور زره او ۴۰۰ ښوونکي زیانمن کړي دي.
د دغه راپور پر بنسټ، د زنده جان او انجیل ولسوالیو او همداراز هرات ښار ۲۷۵ زره اوسېدونکي په مستقیمه توګه له زلزلې زیانمن شوي دي.
د هرات اوسېدونکي، نعمت الله په دې اړه وویل: «تر دې مهاله چې کومې مرستې راغلي ځینو محدودو ولسوالیو ته ورکړل شوي دي ټولو ولسوالیو ته نه دي ورکړل شوي.»
د هرات یو بل اوسېدونکي، غلام حیدري هم وویل: « زموږ په کلي کې له شپږ سوه کورونو یوازې دوه سوه کورونه روغ پاتې دي، نور ټول خراب شوي او مرستې هم نه دي شوي.»
د دغه راپور په یوه بله برخه کې راغلي چې دغې پیاوړې زلزلې، هرات کې د نږدې اویا سلنه ښځو پر کار و بار منفي اغېز کړی او تر اوسه یوازې لس سلنه دغه ښځې توانیدلي چې خپل فعالیتونه له سره پیل کړي.
د ټولنیزو چارو فعال، سید اشرف څرګنده کړه: « د زلزلې له امله رامنځ ته شوې ننګونې ډېرې دي او خلک حیران پاتې او مرستو ته اړتیا لري.»
د ملګرو ملتونو په راپور کې راغلي چې هرات کې د دغې پیاوړې زلزلې په پایله کې ۱۵۰۰ تنه مړه او نږدې دوه زره او ۶۰۰ تنه هم ټپیان شوي دي.
د دغه راپور پر بنسټ، هرات کې نږدې پنځوس زره کورونه زیانمن شوي چې له دې ډلې ۱۳ زره کورونه په بشپړه توګه ویجاړ شوي دي.
په دې اړه مو اندونه