له نشهیي توکو سره د مبارزې وزارت او له نشهیي توکو او درنو جرمونو سره د ملګرو ملتونو سازمان د مبارزې دفتر په یوه ګډ رپوټ کې راغلي چې سږکال په ۳۲۸ هکټار ځمکه کې کوکنار کرل شوي دي.
دغه رپوت ښيي چې سږکال په هېواد کې د کوکنارو کښت ۶۳ سلنه زیات شوی چې د حکومتي چارواکو په وینا د طالبانو او ترهګرو ډلو د تمویل سرچینه بلل کېږي.
د ناامنو سیمو پراختیا، له وسله والو ډلو سره د نشهيي توکو د مافیا همکاري او د تریاکو لوړه بیه د کوکنارو د کښت د زیاتوالي لاملونه بلل کېږي.
سږکال د هېواد په سوېل کې د کوکنارو کښت ۶۰ سلنه، په لوېدیځ کې ۱۷ سلنه، په شمال کې ۱۳ سلنه، په ختیځ کې ۷ سلنه، په شمال ختیځ کې ۳ سلنه او په مرکز کې صفر اعشاریه څلور سلنه زیات شوی دی.
غزني، نورستان او سمنګان هغه ولایتونه دي چې تېر کال کوکنار پهکې صفر شوي وو، خو سږ کال یې په ۱۴۰۰ هکټاره ځمکه کې کوکنارو کرل شوي دي.
له نشهیي توکو سره د مبارزې وزارت د رپوټ له مخې سږ کال د هېواد په سوېل کې ۵۷ سلنه، په شمال کې ۱۶سلنه، په لوېدیځ کې ۱۳سلنه، په ختیځ کې ۹ سلنه او په شمال ختیځ کې ۳ سلنه او په مرکزي حوزه کې صفراعشاریه ۷ سلنه تریاک تولید شوي دي.
د یو ان دي او سي (UNODC) ادارې رییس مارک کولن په دې اړه وویل:«یوازې د کوکنارو د کروندو په له منځه وړلو سره به د ټولنې څنډې ته شوې برخه لازیاته څنډې ته شي، له همدې امله په هماغه کچه چې د قانون واکمني مهمه ده، د کرونګرو لپاره باید د بل کښت زمینه برابره کړو.»
له بلخوا د کورنیو چارو وزارت له دغې ښکارندې سره د مبارزې په برخه کې د بریاوو خبره کوي.
د کورنیو چارو وزارت له نشهيي توکو سره د مبارزې مرستیال عبدالخلیل بختیار وايي:«۲ زره او ۶۴۸ تنه قاچاق کوونکي نیول شوي چې د دغو چاقاق کوونکو له ډلې اته تنه یې ستر قاچاق وړونکي په تور نوملړ کې هم شامل دي.»
په کال کې د افغانستان د نشهیي توکو له قاچاقه په لسګونه مېلیارد ډالر د نړۍ بانکونو ته ورځي.
له نشیي توکو سره د مبارزې وزارت په وینا د دغو پیسو یوازې پنځو تر شپږ سلنه کورنیو قاچاق کوونکو او کرونګرو ته رسېږي.