د ملګرو ملتونو پراختیايي ادارې په خپل نوي راپور کې په افغانستان کې د سوداګرو میرمنو وضعیت څیړلی دی.

په تېرو دریو کلونو کې له درې زره او سلو سوداګرو ښځو شوې سروې ښيي چې ۴۱ سلنه دغو ښځو د خپل کسب او کار لپاره پور اخیستی او یوازې پنځه سلنه یې بریالۍ شوي چې له بانکونو او د کوچنیو پورونو د ورکړې له بنسټونو پورونه ترلاسه کړي او پاتې نورې وايي چې د خپل کار او سوداګرۍ د پر مخ وړلو لپاره اړ شوي د خپلې کورنۍ له غړو او دوستانو پور واخلي.

د ملګرو ملتونو د سر منشي ویاند، سټیفن دوجاریک و ویلي: د ملګروملتونو پراختیايي پروګرام یادونه کوي چې ۷۳ سلنه ښځې د سفري محدودیتونو له امله محدودې دي او حتی نشي کولای د کورنۍ له نارینه غړي پرته محلي بازارونو ته سفر وکړي او دا مسله ستونزې زیاتوي. له دې سره دغه رپوټ یادونه کوې چې ښځې له دې ننګونو سره د مقابلې لپاره د حل لارې موندلو په حال کې دي او د ښځو په مشرۍ ۸۰ سلنه شرکتونه د دوی د عاید لومړنۍ سرچینې په توګه د کاروبار پر عایداتو تکیه کوي.

د یو ان ډي پي په راپور کې راغلي چې ښځې د کورنیو د اقتصادي ودې او ټولنیزې پراختیا لپاره په اقتصادي فعالیتونو کې ډیرې مهمې دي او دغه بنسټ له خپلو شریکانو سره په همکارۍ په افغانستان کې د ښځو تر مشرۍ لاندې ۷۵ زره کوچنیو کارونو ملاتړ کړی او په ټوله کې یې ۹۰۰ زره کسانو ته د دندې فرصتونه رامنځته کړي دي.

په دغه راپور کې له بانکونو د پورونو اخیستل تر ټولو سخته ننګونه او مهمه ستونزه یاده شوې ده.

متشبثې، ممتاز یوسفزۍ طلوع نیوز ته په دې تړاو و ویل: که څه هم کار یې ډېر ښه دی خو په کافي اندازه شتمني نه لري. که کافي پیسې یې درلودې نو کولای یې شول د ځان لپاره یوه بله فابریکه یا کارخونه جوړه کړي او د خلکو لپاره به یې هم د کار زمینه برابره کړې وه.

د سوداګرۍ او پانګونې خونه هم ټینګار کوي چې دمګړۍ د غالۍ اوبدلو، لاسي صنایعو، وچې میوې د پروسس او نورو سکتورونو کې ښځې په کار بوختې دي خو د فعالیتونو د پراختیا لپاره یې باید ملاتړ وشي.

د سوداګرۍ او پانګونې خونې د مدیره پلاوي غړي، خان جان الکوزي و ویل: تر یوه بریده ورته زمینه برابره شوې ده. په نندارتونونو کې ګډون کوي. ښځې په غالۍ اوبدلو، ګنډلو او د وچې مېوې او تازه میوې په برخو او د ترشي باب په تولید کې او په نورو کې او همدا راز په هوټلونو او خیاطۍ په برخو کې کار کوي.

د ښځو د سوداګرۍ او صنایعو خونې شمېرې ښيي چې دمګړۍ په ټول هیواد کې څه باندې نهه زره ښځې د کار جواز په لرلو سره فعالیت کوي.