د دولتي روغتونونو ځينې مسوولان وايي، د متخصصو ډاکټرانو او طبي وسایلو له کمښت سره مخ دي.
د اندراګاندي روغتون مرستیال زیاتوي محمد اقبال صادق، په بېړنیو څانګو کې هم د بسترونو له کمښت سره مخ دي.
ښاغلی صادق وايي: «د ایمار ای په څېر د معاینې لپاره ماشینري ته اړتیا ده چې په روغتون کې دننه نهشته، خو دا خدمات زموږ په روغتون کې نهشته او بله ستونزه زموږ دا ده چې په روغتون کې د ناروغانو شمېر ډېر دی.»
دغه روغتون ته د ورتلونکو ناروغانو شمېر هم زیات شوی دی. دوه کلنه شګوفه له څه مودې راهیسې پر شري ناروغۍ اخته ده او اوس په بېړنۍ څانګه کې بستر ده.
د شګوفې معالج ډاکټر دولت حسین افضلي وايي: «زموږ د متخصصانو له لوري هلته پنځه ورځې ځانګړې ساتنه کېږي او له پنځه ورځو وروسته یې وضعیت کې فرق کوي، بیا دلته د جدي ساتنې خونې ته لېږدول کېږي.»
د دغه روغتون بېړنۍ څانګه یوازې لس بسترونه لري او د بسترونو کموالی د دې لامل شوی چې ناروغان له بېړنیو خدمتونو بې برخې پاتې شي.
ډاکټر عبدالخالق الیاس وايي: «موږ ته داسې ناروغان راځي چې وضعیت ښه نهوي، موږ هره روځ لسو کسانو ته بسترونه لرو، ټول هره ورځ ډک وي، ځکه زموږ د روغتون د هغو ناروغانو شمېر چې وضعیت نازک وي، ډېر دی، اوس هم دې ناروغانو ته رسېدنه نهشو کولای.»
ورته مهال، یو شمېر ناروغ لرونکي وایي، په دولتي روغتونونو کې د درملو کموالی هم یوه جدي ستونزه ده.
ناروغ لرونکی شاه حسین زیاتوي: «لور مې ناروغه وه، ډاکټر ته مې یوړه، نسخه یې راکړه، درمل یې راته لیکلي چې د هغې نانروغۍ درمل هېڅ نهشته.»
د عامې روغتیا وزارت په دولتي روغتونونو کې د انساني او تخنیکي ظرفیتونو د لوړولو لپاره د هڅو خبره ورکوي.
د عامې روغتیا وزارت ویاند شرافت زمان وايي: «د عامې روغتیا وزارت له لوري، په تېر یوه کال کې د تشخیصه او معالجوي څانګو په څېر ټولو برخو کې کار شوی دی، دې برخو ته د تشخیص داسې ماشینونه راوړل شوي چې مخکې نه و.»
تر دې وړاندې د عامې روغتیا وزارت ویلي، چې اوسمهال د افغانستان د روغتیا په برخه کې څه باندې سل زره ډاکټران پر کار بوخت دي، چې دېرش سلنه یې ښځې دي.
په دې اړه مو اندونه