د عامې روغتیا وزارت ویلي چې د ماشومانو د ګوزڼ یا پولیو واکسین کمپاین نن (دوشبنې، د لړم په لومړنۍ نېټه) د هېواد په ۱۱ ولایتونو کې پېل شو.
د دغه وزارت ویاند زیاتوي چې په دغه څلور ورځني کمپین به شپږ مېلیونه ماشومان واکسین کړای شي.
د عامې روغتیا وزارت ویاند شرافت زمان امر خېل وايي:«په عموم کې دغه کمپاین په ۱۴ ولایتونو کې تطبیق کېږي چې درې نورو ولایتونو کې د اکټوبر میاشتې په ۲۱مه نېټه پېل شوی، زموږ موخه په دغه کمپاین کې د ۶٫۳۵ مېلیونو ماشومانو ته د واکسین تطبیق کول دي.»
د ننګرهار یو شمېر اوسېدونکي د دغه کمپاین پر پېلېدو خوښ دي او له عامې روغتیا وزارته غواړي چې د دې ناروغۍ لهمنځه وړلو ته جدي پاملرنه وکړي.
د ننګرهار اوسېدونکی خالد خیال وايي:«له اړوندو ادارو هیله کوو چې په ننګرهار کې ټیمونه زیات کړي او د دغې ناروغۍ د پېښو لپاره حل لار پیدا کړي.»
د ننګرهار اوسېدونکی سمیع الله صمیم هم وویل:«زموږ هیله دا ده هغه لېرې پرې سیمې چې زموږ زیات افغانان په کې دي، ټيمونه واستول شي.»
له دې سره هممهاله یو شمېر واکسیناتوران له هېوادوالو غواړي چې د دغه واکسین د تطبیق په برخه کې ورسره همکاري وکړي.
واکسیناتور محمد نقیب ساحل وویل:«محترمې کورنۍ دې مهرباني وکړي اجازه ورکړي، کله چې موږ او زموږ همکاران د دوی د دروازې تر شا ورځي، باید له موږ سره همکاري وکړي، خپل کم عمره ماشومان چې لري موږ ته یې راولي چې واکسین یې کړو.»
واکسیناتوره فریده حسیني هم وايي:«په دغې موده کې چې موږ کمپاینونه ترسره کړي، د ردولو ډېر ځوابونه مو لرلي دي چې موږ واکسین وکړ همدا د دې لامل شوی چې موږ د کابل په کچه د محیطي سمپل (بېلګه) ولرو چې دا زموږ د ماشومانو لپاره ډېر جدي ګواښ دی.»
یو شمېر ډاکټران وایي، چې د دې ناروغۍ د له منځه وړلو لپاره د کمپاینونو تر څنګ هېوادوالو په تېره بیا د لېريو پرتو سیمو اوسېدونکو ته د واکسین د ګټو په تړاو هم د عامه پوهاوي پروګرامونه وړاندې شي.
ډاکټر فواد ابراهیمي څرګندوي:«زموږ تر ټولو لویه ستونزه چې اوس هم د پولیو پېښې زیاتې شوي دي، په سرحدي ولایتونو کې د مثبتې پېښې دي چې د واکسین په هکله یو خراب نظر لري. تر هغې چې دغه خراب لیدلوری له منځه ولاړ نهشي، نهشو کولای چې د پولیو مخه نیسو.»
افغانستان او پاکستان یوازیني هېوادونه دي چې تر اوسه پهکې د ګوزڼ ناروغۍ له منځه نهده تللې، د عامې روغتیا وزارت د شمېرو له مخې د روان زیږدیز کال له پېل راهیسې په هېواد کې د دې ناروغۍ شپږ مثبتې پېښې ثبت شوې دي.
په دې اړه مو اندونه