د امریکا د منتخب ولسمشر د ملي امنیت سلاکار، جِک سولیون وایي، القاعدې سره د طالبانو د اړیکې د پرې کېدو ژمنه باید په خبرو نه بلکې په عمل کې ثابته شي.
هغه له سي ان ان رسنۍ سره مرکه کې ویلي چې د امریکا او طالبانو ترمنځ د تېر۲۰۲۰ زږدیز کال د ۲۹ مې لاسلیک شوي سند پر بنسټ، طالبانو ژمنه کړې چې القاعدې سره به اړیکې پرې کوي، خو د ده په وینا دا خبره باید په عمل کې ثابته شي.
د سولیوین په وینا، امریکا سره د لاسلیک کړي سند پر بنسټ طالبان باید جګړه کمه کړي او په ښه نیت سره، د افغانستان حکومت سره مذاکره وکړي.
د بایډن ملي امنیت سلاکار وایي، جوبایډن به داسې تګلاره ولري، چې افغانستان کله هم د ترهګرو په خوندي پتنځای بدل نه شي.