د اسلامي امارت مشر مولوي هبت الله اخندزاده د کابل ولایت له ځینو دیني عالمانو سره په لیدنه کې، د اسلامي شریعت په چوکاټ کې د ښځو د حقونو او ښوونې د مسلې په هکله خبرې کړې دي.
ځينې دغه دیني عالمان چې بېرته کابل ته راستانه شوي دي، وايي چې د اسلامي امارت له مشر سره په لیدنه کې د اسلامي قوانینو په چوکاټ کې د ښځو حقونو د درناوي، د ښوونځيو او مدرسو د ښوونیز نصاب د بیاغور او د پلازمېنې د اوسېدونکو ستونزو ته د رسېدنې په ګډون په بېلابېلو مسایلو خبرې اترې کړې دي.
دوی وایي، د کابل له والي سره یې یو ځای د دوشنبې په ورځ په کندهار کې د اسلامي امارت له مشر مولوي هبت الله آخندزاده سره لیدلي دي.
د اسلامي امارت غړی عبدالحمید حماسي وايي:«د بشري حقونو، د انسانانو د حقونو، د یتیمانو او ګونډو د حقونو په هکله ډېرې ښې سپارښتنې یې لرلې.»
د اسلامي امارت بل غړي مولوي محمد زاید هم وویل:«دا اختلافونه باید له هېواده ختم شي، علماوو ته یې ډېره سپارښتنه وکړه چې په منبرونو کې په دې هکله د خلکو ذهنونه پرانیزي څو ټول خلک له اختلافونو لاس واخلي.»
ورته مهال د کابل والي وایي، د اسلامي امارت مشر ورته لارښوونه کړې چې د کابلیانو قانوني ستونزو ته دې رسېدنه وکړي.
د کابل والي شیخ ندا محمد ندیم څرګنده کړه:«له ملا هبت الله سره د کابل د علماوو غونډه درې تر څلورو ساعتونو دوام وکړ او پر مهمو موضوعګانو بحث وشو او د اسلامي امارت مشر د کابلیانو د ستونزو د حل لپاره ډېر حکمونه ورکړي دي.»
دغه دیني عالمان وایي، د ښځو ستونزو ته رسېدنه، د شریعت په چوکاټ کې د هغوی حقونو ته درناوی او د ښوونځیو او مدرسو پر نصاب بیا کتنه هغه موضوعات وو چې په اړه یې د اسلامي امارت مشر دوی ته لازمې لارښوونې کړې دي.
په دې اړه مو اندونه