پخواني ولسمشر اشرف غني د نوروز په اړه ملت ته د مبارکۍ په پیغام کې د هېواد د کړکېچ د مدیریت لپاره یو وړاندیز او ۷ حل لارې مطرح کړېدي.
ښاغلي غني په دې پېغام کې د ملي اجماع لپاره د ملي بحث وړاندیز کړی او د بشري او اقتصادي ناورین د مدیریت لپاره یې حل لارې هم وړاندې کړې دي.
یو شمېر کارپوهان د پخواني ولسمشر دا وړاندیزونه ګټور بولي، خو ځينې نور بیا وايي، ښاغلی غني خپله د افغانستان د بشري او اقتصادي ناورین ستر لامل و.
پخواني ولسمشر د دوشنبې په شپه ناوخته له خپلې فېسبوک پاڼې په یوه غږیز پېغام کې ولس ته د نوروز د مبارکۍ په پلمه ظاهراً سرپرست حکومت ته د یوه ملي بحث د پيلولو وړاندیز وکړ. هغه په دې پيغام کې هېواد په داسې دوه لارې کې ولاړ وباله چې د ده په ټکو د نه پاملرنې په صورت کې ښايي یو وار بیا د تېرو څلوېښتو کلونو د جګړو ترخې تجربې تکرار شي.
پخواني ولسمشر اشرف غني په دې هکله وویل:«ضرور ده چې موږ يو ملي بحث خپل منځ کې پيل کړو او نتیجې ته ورسېږو، که یو بل و نه منو او افغانستان د ټولو کور و نه ګڼو او هر افغان ته د دې حق ورنه کړو چې خپل افغانیت، اسلامیت او ژمنه ثابته کړي، فرصت به مو له لاسه ورکړی وي، د يوه او بل په منلو کې نن موږ ټول ټولېدای شوو او د خدای له برکته هم فېزیکي شتمني او هم پانګې او ظرفیتونه لرو چې د هغې له لارې کولای شو له فقر او مجبوریت نه ووځو.»
نوموړي په دې پېغام کې د هېواد د بشري او اقتصادي ناورین مدیریت لپاره هم ۷ وړاندیزونه کړيدي.
د نړۍوالو مرستو شفاف مدیریت، په ملي کچه د ولسونو تر منځ پخلاینه او سوله، په واک کې د نورو افغانانو شریکولو ته موکه برابرول، د ځان بساینې لپاره د نړۍ پر ځای پر داخلي امکاناتو فکر، له ملي اجماع سره د نظام ټاکنه او مشروعیت ته رسېدل، د بېطرفۍ سیاست او نړۍ سره د لویو پروژو عملي کول، د امنیت ټنګښت، ملي او نړۍوالو پانګوالو ته زمینهسازي.
ښاغلی غني زیاتوي:«موږ په يوې دوه لارې کې يوو، يا به د پخوا ۴۰ کلونو غلط تصامیم تکراروو. که په هغه لار روان شو له يوه خوا به د ۲۱ پيړۍ د بشري مرستو مستعمره شو... او پرديو د جنګ میدان. بله لار شته هغه د اسلام مبین دین، ملي وحدت، تپلپاتې سولې، اقتصادي خوځښت، د ملي، سيمه ييز او نړیوال مشروعيت تګلاره ده.»
د چارو شنونکي د پخواني ولسمشر د دې څرګندونو په اړه بېلابېل نظرونه لري. ځينې وايي کارپوهان اوسني وضعیت ته په پام سره د ښاغلي غني وړاندیز شوې تګلارې ګټورې ګڼي، خو ځينې نور وايي چې اوسنی ګډوډ وضعیت د جمهوریت په دوران کې د هغه د ناوړه کړنو له امله دی.
د نړۍوالو چارو شنوونکی سید جواد سجادي وايي:«د قاعدې پر بنسټ باید بنسټيزې او منطقي خبرې باید ومنوو، له دې پرته چې څوک یې کوي. له حقوقي او ساسي پلوه ښاغلی غني دا حق لري چې د هېواد د سترو مسایلو په هکله خپل نظر څرګند کړي. خو له اخلاقي پلوه، دی هغه کارنامه چې لري د دې ځایګی نه لري.»
د سیاسي چارو شنوونکی ویس ناصري هم وویل:«دا پیغام د منځپانګې له پلوه ښه پیغام دی... خو د ښاغلي اشرف غني احمدزي کړنه د هغه د حکومت پر مهال په بشپړه توګه د دغې وړاندیز شوې طرحې پر خلاف وه.»
د تېر حکومت تر سقوط وروسته، افغان ولس ته د پخواني ولسمشر دا دویمه وینا ده چې له خپلې فېسبوک پاڼې یې خپروي، خو په کابل کې لا چارواکو تر اوسه دی ته غبرګون نه دی ښودلی.
په دې اړه مو اندونه