یارمحمد دوستم، پسر ارشد جنرال عبدالرشید دوستم، معاون اول رییس جمهور به حیث فرمانده گارنیزیون ولایت جوزجان معرفی شد.
رحمت‌الله ترکستانی، فرمانده پلیس ولایت جوزجان می‌گوید در جلسۀ امنیتی ولایت جوزجان تصمیم گرفته شد که یارمحمد، پسر جنرال عبدالرشید دوستم به عنوان فرمانده گارنیزیون ایفای وظیفه کند.
وی، می‌گوید در تشکیل این گارنیزیون صد نفر از اردوی ملی، پلیس ملی، نظم عامه و نگهبانان ویژۀ معاون رییس جمهور استند.
این درحالی است که امنیت شهر شبرغان، مرکز ولایت جوزجان، اکنون از سوی سربازانی تأمین می‌شود که به تازه‌گی در چوکات گارنیزیون جذب شده‌اند.
با این همه، شماری از ولسوالی‌های ولایت جوزجان با تهدیدهای امنیتی روبه رو است؛ در ولسوالی‌های آقچه، مردیان، فیض‌آباد جنگ میان نیروهای دولتی و هراس افگنان به شکل پراکنده وجود دارد. اما شهروندان شبرغان، از امنیت این شهر راضی استند.