ولسي جرګې نن(چهارشنبې د لیندۍ په ۱۲مه نېټه) پنځو نوماند وزیرانو او د مرکزي بانک نوماند رییس ته د باور رایې ورکړې لپاره صندوقونه کېښودل.
د ولسي جرګې په نننۍ غونډه کې د ۲۴۹ استازو له ډلې ۲۴۲ تنو حضور درلود او خپلې رایې استعمال کړې چې د بریا لپاره د ۱۲۲ رایو ترلاسه کول نصاب ټاکل شوی و.
کریمې حامد فاریابي له ولسي جرګې د ۱۳۶ باور رایو په ترلاسه کولو سره د اقتصاد وزیرې په توګه وټاکل شوه.
جواد عثماني له ولسي جرګې د ۱۴۵ باور رایو په ترلاسه کولو سره د عامې روغتیا وزیر په توګه وټاکل شو. هغه ۳۸ رد، ۴۷ باطلې او ۱۲ سپينې رایې هم واخیستې.
محب الله صمیم له ولسي جرګې د ۲۰۹ باور رایو په ترلاسه کولو سره د سرحدونو او قبایلو چارو وزیر په توګه وټاکل شو. ښاغلي محب ۱۲ رد، ۱۶ باطلې او ۵ سپينې رایې هم واخیستې.
بلخوا ولسي جرګې ته د معرفي شویو کسانو له ډلې د پوهنې وزارت ته نوماندې رنګینې حمیدي، کلیو پراختیا وزارت ته نوماند مجیب الرحمن کریمي او مرکزي بانک ته نوماند رییس اجمل احمدي د باور رایې ترلاسه نه کړې.
له دې ډلې پوهنې وزارت ته نوماندې، رنګینه حمیدي د ۱۱۴ رایو په ترلاسه کولو سره ونه توانېده چې یاد وزارت ته لار ومومي.
همداراز د کلیو بیارغونې او پراختیا وزارت ته نوماند، مجیب الرحمن کریمي د ۱۱۸ رایو په ترلاسه کولو سره ونه توانېد چې یاد وزارت ته لار ومومي.
ترڅنګ یې د افغانستان بانک لپاره نوماند رییس، اجمل احمدي د ۷۲ باور رایو په ترلاسه کولو سره ونه توانېد چې یاد بانک ته لار ومومي. د پارلمان غړو ښاغلي احمدي ته ۷۴ رد او ۷۴ باطلې رایې ورکړې وې.