د هېواد په ټولو ولایتونو کې د څه باندې ۵۰ زره متقاضیانو په ګډون د دیني مدرسو د دولسم، لیسانس او ماسټرۍ دورې فارغانو د سویې د تثبیت په موخه، کلنۍ ازموینه پېل شوه.
د لوړو زدهکړو وزارت سرپرست ندا محمد ندیم چې د دې ازموینې د بهیر د څارنې په موخه د هېواد شمالي ولایتونو ته تللی، وايي چې دغه ازموینه د پوهنې وزارت په همغږۍ د پرمختللي ښوونیز نظام د لرلو په موخه اخیستل کېږي.
د لوړو زده کړو وزارت سرپرست وايي:«د دې لپاره چې دغه لړۍ د کیفیت له اعتبار سره مل وي او د جعل مخه ونیول شوي او یو روڼ او پرمختللی نظام ولرو.»
د پوهنې وزارت د اسلامي تعلیماتو معینیت د دارالعلومو رییس عبدالقدوس قدوسي هم څرګندوي:«د افغانستان په کچه په ۳۴ ولایتونو کې په درې پړاوونو کې ازموینه اخیستل کېږي؛ عالمیه دوره، عالیه او ثانویه دورو کې د افغانستان په کچه ۵۰ زره طالبانو ګډون کړی وو.»
د دې ازموینې یو شمېر ګډونوال د دیني زدهکړو تر څنګ د عصري علومو پر زدهکړې هم ټینګار کوي.
په جوزجان د ازموینې ګډونوال محمد رحیم طلوعنیوز ته وايي:«د دا ډول پروسې پېل ډېر ښه دی په ځانګړې توګه هغه وخت چې ډېری طالبالعلمانو اسنادو ته لاسرسی نهدرلود.»
د ازموینې بل ګډونوال حسیب الله هم وویل:«ملا ته هم اړتیا ده قاري ته هم اړتیا ده چې د ساینس او جغرافیې په هکله معلومات ولري.»
د مسوولانو په خبره، دغه ازموينه د مرغومې په ۳۰مه پېل او شپږ ورځې به دوام وكړي چې د ازموینې له پاى ته رسېدو وروسته به برياليو ګډونوالو ته تحصیلي سندونه هم ورکړل شي.
په دې اړه مو اندونه