اطلاعاتو ته د لاسرسي د نړۍوالې ورځې په درشل کې، نی یا د افغانستان د ازادو رسنیو د ملاتړ کمیټه وايي، د اسلامي امارت له بیا واکمنېدو وروسته اطلاعاتو ته د نه لاسرسي کچه ۳۲ سلنه لوړه شوې ده.
د دغه بنسټ په وینا، د رسنیو او د رسنیو د کارکوونکو لپاره د اساسي قانون د نشتوالي له امله اطلاعاتو ته د لاسرسي کچه راټيټه شوې او اسلامي امارت باید دې موضوع ته جدي پام وکړي.
د افغانستان د رسنیو د ملاتړ دفتر مسوول، محمد ظریف کریمي وویل: «مخکې په افغانستان کې اطلاعاتو ته لاسرسی ۵۵ سلنه محدود شوې و، خو هغه شمیرې او مالومات چې موږ راټول کړي، د جمهوریت په پرتله ۳۲ سلنه زیاتوالی ښیي.»
د افغانستان د ژورنالستانو ټولنې مسوول، مسرور لطفي طلوع نیوز ته وویل: «په اوسنیو شرایط کې زموږ موندنې ښیي چې اطلاعاتو ته د لاسرسي حق د قانون په نه شتون کې، د افغانستان په ځینو برخو کې اطلاعات په بېلابېلو ډولونو ورکول کیږي چې دا په خپله لویه ستونزه رامنځته کوي.»
یو شمېر خبریالان بیا وايي، اطلاعاتو ته د نه لاسرسي له امله له ګڼو ستونزو سره مخ دي.
خبریال، شاه اغا سادات وویل: «افغان خبریالان له تېرو دوو کلونو راهیسې له ګڼو ستونزو سره مخ دي، داسې ویاندویان هم شته چې د خبرو کولو لپاره نه حاضریږي او تر ټولو لویه ننګونه همدا ده.»
د اطلاعاتو او کلتور وزارت نشراتي مرستیال بیا ټینګار کوي چې اطلاعاتو ته د خبریالانو لاسرسی د هغوی حق دی او د رسنیو قانون د توشیح لپاره د اسلامي امارت رهبر ته لیږل شوی دی.
د اطلاعاتو او کلتور وزارت نشراتي مرستیال، مهاجر فراهي طلوع نیوز ته وویل: «موږ د حکومتي ادارو ټول ویاندویان په دې مکلف کړي چې په خپل کاري چوکاټ کې رسنیو ته پر وخت مالومات ورکړي.»
د رسنیو د ملاتړو بنسټونو له لوري د ورکړ شویو مالوماتو له مخې، له وروستیو تحولاتو وروسته او شته ستونزو ته په کتو، د افغانستان له نیمايي زیاتې رسنۍ غیرفعالې شوي او کابو ۷۰ سلنې خبریالانو او د رسنیو کارکوونکو خپلې دندې له لاسه ورکړي دي.
په دې اړه مو اندونه