د صنعت او سوداګرۍ وزارت وايي چې د دغه وزارت پر رسمي بلنې د پاکستان د سوداګرۍ وزارت د مرستیال په مشرۍ یو پلاوی نن (دوشنبې) کابل ته راغلی دی.
د دغه وزارت ویاند اخندزاده عبدالسلام جواد زیاتوي، چې دغه پلاوی د صنعت او سوداګرۍ وزارت په رسمي بلنه په دوه ورځني سفر کابل ته راغلی او ټاکل شوې چې د اسلامي امارت له چارواکو سره د سوداګریزو او ټرانزیتي ستونزو د حل په تړاو خبرې وکړي.
د صنعت او سوداګرۍ وزارت ویاند وویل:«د پاکستان د سوداکرۍ وزارت مرستیال محمد خرم اغا د یوه جګپوړي پلاوي په مشرۍ د صنعت او سوداګرۍ وزارت په رسمي بلنې کابل ته تشریف راوړی دی. او ټاکل شوې دغه پلاوی په دوه ورځني سفر کې د دغه وزارت له مشرتابه سره د دواړو هېوادونو ترمنځ پر پراختیا او د سوداګریزو او ټرانزیټي ستونزو پر حل به خبرې اترې وکړي.»
بل پلو، ځينې سوداګر وايي، په کراچۍ بندر کې د درول شویو کانټېنرونو پرېښودل، د تورخم او سپین بولدک په لارو کې د ستونزو حل او د پاسپورټ او وېزې د ستونزو هوارول باید د اسلامي امارت له چارواکو سره د پاکستاني پلاوي د خبرو چورلیز وي.
سوداګر امید حیدري طلوعنیوز ته څرګنده کړه:«سیاسي ستونزې چې پاکستان یې په خاطر هر کله بندرونه تړي، سوداګرو ته جدي ستونزې رامنځته کړي او په مېلیونونو ډالرو یې زیان کړی دی.»
د افغانستان - پاکستان د سوداګرۍ ګډه خونه وایي چې، پروسږکال سوداګریزې او ټرانزیټي ستونزې د دې لامل شوې چې له پاکستان سره د سوداګریزه راکړه ورکړه خورا کمه شي.
د افغانستان - پاکستان د سوداګرۍ د ګډې خونې رییس خانجان الکوزی وايي:«دا چې اقتصاد د دواړو هېوادونو په ګټه دی، هیله لرم او باید عملاً یې ووینوو چې څه کېږي. له بده مرغه باید ووایم چې خبرې او غونډې نهعملي کېږي.»
د صنعت او سوداګرۍ وزارت د معلوماتو له مخې، په ۱۴۰۲ لمریز کال کې د صادراتو کچه ۹۲۶ مېلیونو ډالرو ته رسېدلې وه، په داسې حال کې چې په ۱۴۰۱ لمریز کال کې دغه کچه یو مېلیارد او ۲۰۰ مېلیونه ډالره وه.
په دې اړه مو اندونه