د تخار د والي پخوانی ویاند جواد هجري ادعا لري له هغې وروسته کله چې د امنیتي ځواکونو په یوه هوايي برید کې د ماشومانو د مرګ ژوبلې په هکله رپوت خپرو کړ، د ولسمشر د لومړي مرستیال په حکم د درې ورځو لپاره د امنیت په نیونه کې وم او له هغې وروسته د ولسمشرۍ د حکم پربنسټ له دندې ګوښه کړل شوم.
جواد هجري وايي چې هغه د ځايي سرچینو او د ولایت له مقام سره په همغږۍ د تلې په ۳۰ مه نېټه پر یوه جومات د امنیتي ځواکونو د برید په هکله اطلاع رسونه کړې وه.
هغه په دې اړه زیاته کړه:«د محترم ولسمشر صاحب له خوا د ولایت د مقام له ویاندویۍ زما د ګوښه کېدو موضوع، په نېغه توګه له هغې حادثې سره اړیکه لري چې د تلې په ۳۰۹ په تالقانو کې رامنځته شوې وه»
ښاغلی هجري وايي چې له هغه برید وروسته په خپله روغتون ته تللی و او چارواکو ورته ویلي وو چې د هغه څه رپوټ ورکړي چې لیدلي یې دي.
د تخار ولایت د عدالت غوښتنې کمېټې غړی بشیر احمدبشار وايي:«یوه ناعادلانه موضوع ده چې حکومت او د حکومت مشرتابه دلته عدالت نه دی تامین کړی.»
خو حکومت لاهم ټینګار کوي چې د امنیتي ځواکونو هوايي برید د طالبانو پر یوه مرکز شوی و، او د تخار والي ویاند رسنیو ته ناسم رپوټ ورکړی و او له همدې امله ولسمشر لارښوونه کړې ده چې والیان ویاند ونه لري.
د سیمه ییزو ارګانونو د ادارې ویانده نرګس مومند هم څرګندوي:«د دوی کاري بست له موږ سره خوندي دی خو یه یوه اندک توپیر سره.»
جواد هجري ویلي وو چې د تخار د مرکز تالقان ښار په هزاره قرلق سیمه کې د امنیتي ځواکونو په اشتباهي برید کې دولس تنه وژل شوي او څلورلس ماشومان ټپيان شوي دي.