بېګاه (چارشنبه د زمري په ۱۳ مه) د سرپل ولایت اوسېدونکو د الله اکبر په نارو سره ددغه ولایت مرکز ته راوتلي وو او له افغان ځواکونو یې خپل ملاتړ اعلان کړ.

د سرپل یوه اوسېدونکي ویلي: " د بلخاب خلکو تل په یو غږ طالبانو او نورو ډلو ته ځواب ورکړی او هر څوک چې زموږ خلکو ته په سپکه وګوري، سخت ځواب به ورکړل شي. "

د سرپل ولایت یوه بل اوسېدونکي ویلي:"موږ د افغانستان اسلامي جمهوري نظام او اساسي قانون څخه دفاع کوو. "

د سرپل پر اوسېدونکو سربېره، د نورستان، کاپيسا او بغلان ولایتونو اوسېدونکو هم د چهارشنبې پر شپه د الله اکبر نارې وکړي او پر باطل یې د حق پر بري ټینګار وکړ.

دیني عالمان دغه کمپاین ستایي او وایي چې د هېوادوالو له لوري د الله اکبر نارې دا ثابتوي چې افغان ځواکونه له ولسي ملاتړه برخمن دي.

د حضرت علي جومات امام میر سعید ساعدي ویلي: "پر روحیې ډېر اغېز کوي. الله اکبر هغه څوک وایي، چې مسلمان وي او کله به هم ناکام نه شي. "

د سنت الله رحیمي په نوم یوه دیني عالم ویلي:"د اسلام دین د یوه خاص کس دین نه دی. الله اکبر یوه سپیڅلې کلمه ده او څوک یې ځان ته نسبت نه‌شي ورکولی. "

عام خلک وایي چې د الله اکبر نارې لړۍ خلکو خپله پیل کړی بهیر دی او باید ترې سیاسي ګټه وانخېستل شي.

د الله اکبر نارې درې شپې وړاندې د هرات د اوسېدونکو له لوري پېل شوې او وروسته د څو نورو ولایتونو اوسېدونکو هم دغه نارې بدرګه کړې.

طالبان خبرداری ورکوي چې د الله اکبر شعار د دوی دی او ددې ډلې په وینا له هغو کسانو سره به حساب وشي چې له الله اکبرنارې نه ګټه پورته کوي.