د امریکا مخکیني ولسمشر ډانلډ ټرمپ له افغانستان نه د امریکایي ځواکونو پر وتلو نیوکه کړې او دا چاره یې شرمونکې او وحشتناکه بللې.

ټرمپ له فاکس نیوز سره مرکه کې د امریکا جګپوړي نظامیان له افغانستان نه په بېړه د امریکایي ځواکونو وتلو کې مسوول ګڼلي دي او زیاته کړې یې ده، څه چې پېښ شول باید امریکایي نظامیانو یې پېښېدو ته اجازه نه وای ورکړې.

د ټرمپ په وینا، امریکا باید په ځواک سره له افغانستان نه وتلې وای او په بېړه وتل یې تسلیمۍ ته ورته چاره وه.

ډانلډ ټرمپ ویلي: "هغه څه چې هغوی په اصطلاح شاتګ وکړ، په رېښتیا چې تسلیمي وه، شرمونکې او وحشتناکه چاره وه، چې کله هم له رواني اړخه ترې نه شو خلاصېدای. "

د ټرمپ دا خبرې داسې حال کې دي، چې هغه د خپلې واکمنۍ پر مهال افغانستان کې د امریکایي سرتېرو د شمېر کمولو امر وکړ او د ټولو امریکایي پوځیانو شمېر یې ۲۵۰۰ ته راښکته کړ.

د امریکا ولسمشر د بایډن په اداره نیوکه کړې، چې امریکایي ځواکونه څرنګه مخکې تر هغې له افغانستان نه ووتل چې ځینې امریکایان او د امریکا ویزه لرونکي افغانان په افغانستان کې پاتې شوي.

ټرمپ د وسایلو په نه لېږدېدو هم نیوکه کړې ده.

ډانلډ ټرمپ د بګرام پوځي اډې د پرېښودو له کبله هم نیوکه کړې او ویلي یې دي، چې چین به د دې پوځي اډې مسوولیت خپل کړي.

ټرمپ ویلي: "موږ باید د بګرام له پوځي اډې نه وای وتلي: "دا اډه چین ته نږدې ده او د چین اټومي مرکز ته یو ساعت واټن کې ده. زما وړاندوینه داده چې چین به د دې مرکز کنټرول خپل کړي. "

وړاندې اسلامي امارت چینایانو ته د بګرام پوځي اډې د ورکولو راپورونه رد کړي.