اسلامي امارت وايي چې افغانستان په سیمه ییز نښلون یا اتصال کې متوازن او بې پرې سیاست غوره کړی دی.
د اسلامي امارت ویاند وایي، که افغانستان دا ډول تګلاره غوره نه کړي، د بهرنیو مداخلو لپاره به زمینه برابره شي.
د اسلامي امارت وياند ذبيح الله مجاهد څرګندوي:«دا سیاست دوامداره کېدل غواړي، دغه پاليسي ساتل غواړي او حمایه کېدل غواړي. چې موږ د اوږدمهال لپاره دغه متوازه سياست وساتو او دغه د تلې پله رانه کږه نه شي. که خدای مه کړه دا پله رانه کږه شي، بيا دلته د مداخلو لپاره لاره هوارېږي. دغه فرصتونه چې موږ يې په لاس کې لرو دا ضايع کوي.»
د سیمه ییز نښلون د فرصتونو او ننګونو په سیمینار کې یو شمېر څېړونکو او د سرپرست حکومت یو شمېر چارواکو په سیمه کې د افغانستان اهمیت څېړنې باندې خبرې وکړې.
د سيمه ييز اتصال فرصتونه او ننګونې سيمینار د علومو اکاډمۍ د سيمه ييزو مطالعاتو د مرکز له لوري په ارګ کې جوړ شو.
د رياست الوزراء اداري مرستيال د افغانستان رول په منطقوي نښلون کې مهم ګڼي. عبدالسلام حنفي ډاډ ورکوي، چې په هېواد کې به ډېر ژر د ټاپي، کاسا زر، اوسپنې پټلۍ، نوري فايبر او ځينو نورو مهمو پروژو چارې پيل شي.
ښاغلي حنفي وویل:«د سیمه ییز نښلون لپاره د افغانستان رول ډېر مهم او سټراټېژيک دی. افغانستان د اسیا د څلور لارې په توګه د سیمه ییز نښلون لپاره ځانګړی ځایګی لري.»
په دې سيمينار کې د يو شمېر ګاونډيو هېوادونو استازو هم ګډون کړی دی.
بل لور ته د سيمه ييزو مطالعاتو د مرکز ځينې څېړونکي د افغانستان اوسنی وضعيت د سيمه ييز اتصال لپاره مهم ګڼي.
د سيمه ييزو مطالعاتو د مرکز غړی عبدالصبور مبارز وايي:«د افغانستان جیو پوليټيک موقعیت دی. مخکې تر مخکې لاسليک شوې پروژې دي. همدا راز د اسلامي امارت اقتصادي محوره بهرنی سیاست او د امنیت شتون یو بل غټ فرصت دی.»
د دغه سيمينار په پرېکړه ليک کې هم له اسلامي امارته غوښتل شوي، چې د سيمه ييز نښلون لپاره دې بې پرې سياست غوره کړي او له ګاونډيو هېوادونو سره دې ګډ بازارونه جوړ شي.
په دې اړه مو اندونه