د سرپل بلخاب ولسوالۍ کې د ملي پراختیا شرکت له لورې د ډبرو سکرو په کانونو کې د سمڅو د ایستلو مخه نېول شوې چې د را لوېدو خطر یې له منځه وړی دی.
د ډبر سکرو له کانونو ډکه په دغه غرنۍ ولسوالۍ کې اوسېدونکي وایي چې د وزګارتیا کچه پورته تللې او روغتیایي امکانات په نیشت شمېر دي.
دې سره د ملي پراختیا شرکت مسوولین وایي چې د سرپل بلخاب ولسوالۍ د ډبرو سکرو پیسې به د قوشتیپې پر کانال ولګول شي.
د بلخاب اوسېدونکي مرزا حسن طلوع نیوز سره خبرو کې و ویل: «د کانونو کېندنه اوس بند شوې ده او کاروبار نشته، ډېر خلک بېکاره دي او ځینې بهر ته لاړل.»
د بلخاب بل اوسېدونکي محمد حسین فصیحي و ویل: «له اسلامي امارت څخه زموږ غوښتنه دا ده چې لومړی دې ټولنیز عدالت رامنځته شي او بیا دې کار زمینه برابره شي.»
د ملي پراختیايي شرکت مسوولین بیا وايي، دغه اداره هڅه کوي چې د بلخاب د ډبرو سکرو د حوزې د کېندنې، را ایستنې او بارولو کار ته پراختیا ورکړي او په راتلونکي کې د دغه کار لپاره لا زیات مسلکي کارګر وګوماري.
عبدالرحمن عطاش وايي، دمګړۍ د ملي پراختیايي شرکت له لوري په دغه سیمه کې د سړک جوړونې کار هم دوام لري چې په دغه پروژه کې د سیمې یو شمېر اوسېدونکو ته هم د کار زمینه برابره شوې ده.
د ملي پراختیايي شرکت عمومي اجرائیوي رییس عبدالرحمن عطاش و ویل: « نږدې راتلونکې کې به د ولسي خلکو کارونه بیا پیل شي چې هم به اصولي وي او هم په تخنیکي او د کانونو له نورم سره سم به مخکې ځي.»
د مالیې وزارت بیا ټینګار کوي چې د اسلامي امارت د بودجې یوه برخه د ډبرو سکرو د کانونو له را ایستنې او صادراتو تمویلیږي.
د مالیې وزارت ویاند احمد ولي حقمل د طلوع نیوز خبریال ته داسې و ویل: «موږ په تېرو ۲۰۲۳ کال کې یو اعشاریه ۶ میلیونه ټنه د ډبرو سکاره پاکستان، ایران، ترکیې او جرمني ته صادر کړي دي چې ارزښت یې نږدې ۲۲ میلیارده افغانۍ کیږي.»
بلخاب ولسوالۍ څه باندې ۱۳۰ زره نفوس لري چې ډيری اوسېدونکي یې د بڼوالۍ او مالدارۍ له لارې ډوډۍ پیدا کوي.
د وروستیو مالوماتو پر بنسټ د سرپل د بلخاب ولسوالۍ غرونه نږدې یو نیم میلیارد ټنه د ډبرو سکاره لري.
په دې اړه مو اندونه