نن سېشنبې (د غوايي په ۱۹ مه)په جلال اباد ښار کې د ډیورنډ کرښې د دواړو غاړو قومي مشرانو د یوې ګډې سولهییزې جرګې په ترڅ کې وویل د روانې ترهګرۍ چې پاکستان یې ملاتړی دی اصلي زیانونه د قبایلي سیمو اوسېدونکي ویني او د کرښې هغه غاړه یې د ترهګرو په مرکز بدله کړې ده.
د کرښې د هغې غاړې قومي مشران په زغرده وایي چې پاکستان هڅه کوي ؛چې داعش په سیمه کې په یوه لوی ځواک بدل کړي.
د ډیورنډ کرښې د هغې غاړې د قبایلو شورا مشر ذرجانشیواری وايي:«هلته د کرښې هغې غاړې پاکستان زموږ کورونه وران وي، موږ ترهګر نه یوو او پاکستان دی چې غواړي داعش د ډیورنډ کرښې په دواړه غاړو کې په یوه لوی ګارنیزون بدل کړي.»
د قبایلو سیمو د اوسېدونکو نیوکه دا ده چې پاکستاني پوځیان د ترهګرو په جامه کې دي او هره ورځ د قبایلو سیمو اوسېدونکي لویې قربانۍ ورکوي.
د وزیرستان قومي مشر ډاکټر حیات مسعود څرګنده کړه:«مونږ په سترګو ډېر څه ولیدل، ووژل شو او دا لړۍ لا هم روانه؛خو په خولو ډېرې خبرې نهشو کولای.»
د خېبر ایجنسۍ قومي مشر حکم خان هم وايي:«موږ په اسلام اباد کې هم ناستې کوو، هلته به هم د ترهګرۍ په خلاف اقدام وکړو.»
د کرښې دې غاړې قبایلو سیمو اوسېدونکي د پاکستان توغندويي بریدونه غندي او د مخنيوي غوښتنه یې کوي.
د ننګرهار قومي مشر جهانزیب مومند وویل:« پاکستان دا غاړه په توغندیو ولي، په دې کار سره غواړي د ډیورنډ کرښه کې پراته کورونه خالي کړي او پوځیان یې مخکې راتګ وکړي.»
په پرېکړه لیک کې له پاکستاني حکومت څخه غوښتل کېږي چې د ډيورنډ پر کرښه دې اغزن تارونه او دیواله و نه غځوي.
قومي مشر خېرالدین هم په ډاګه کړه:پاکستان دې له قبایلي علاقو خپل پوځونه وباسي او د جګړې لمن دې ټوله کړي، موږ د خپلو سیمو امنیت په خپلو قومي تړونونو ساتلی شوو.»
دا په داسې حال کې ده چې په کندهار او ننګرهار کې د ډیورنډ کرښې له هغې غاړې پاکستاني پوځیانو دا غاړه په توغندیو ولي چې په پاپله کې یې مرګ ژوبله او ډېر مالي زیانونه یې هم خلکو ته اړوي دي.