د کابل په صرافیو کې د یوه ډالر بیه څه کم ۶۷ افغانیو ته رسېدلې ده.
د هېواد د صرافانو ټولنې نن یکشنبې (د لړم په ۲۱مه) طلوع نیوز ته وویل چې د هېواد په بازارونو کې یو امریکایي ډالر په ۶۶٫۵۰ پولو تبادله کېږي.
د دې ټولنې ویاند وایي، چې په راکړو ورکړو کې د نورو اسعارو په تېره بیا د کلدارو د نه کارول کېدو لپاره د ټاکل شوي ضرب الاجل په پای ته رسېدو سره، د ډالر پر وړاندې د افغانۍ ارزښت لوړ شوی دی.
د صرافانو د ټولنې ویاند ویاند عبدالرحمن ځيرک وايي:«عمده دلیل دا دی په هغو ولایتونو کې چې له کلونو راهیسې په کې کلداره په چلښت کې وه، کلونه کلونه پر راکړه ورکړه کېده، دا چې هغو کلدارو ته د افغانستان بانک له خوا موقع یا ضربالاجل ورکړل شوی و.»
صراف محمد داوود نظري څرګندوي:«له تېرو درې میاشتو راهیسې د افغانیو قیمت په تدریجي ډول سره پورته ځي او ډالر ښکته راځي، نو دا د افغانستان د اقتصاد لپاره یوه ډېره ښه خبر دی.»
د هېواد د صرافانو ټولنه دغه راز وایي چې د افغانیو د ثبات د ساتلو لپاره باید بازارونو ته نورې افغانۍ هم را وایستل شي.
بلخوا، د افغانستان بانک وایي چې د افغانیو کافي سرچیني لري او که اړتیا شي د هېوادوالو د ستونزو د حل لپاره به یې بازار ته وړاندې کړي.
د مرکزي بانک ویاند حسیب الله نوري وايي:«درنو هېوادوالو ته ډاډ ورکول کېږي چې د افغانستان بانک کافي افغانۍ بانکنوټونه په واک کې لري، ترڅو د پولي شاخصونو په پام کې نیولو سره، بازار ته یې طزیق کړي او خپاره کړي.»
سره له دې چې د افغانیو پر وړاندې ډالر بیه کمه شوې ده؛ خو د پلازمېنې ځينې اوسېدونکي لاهم د خوراکي توکو د بیو له لوړوالي شکایت کوي.
د کابل اوسېدونکي فیصل وویل:«له دولته مو غوښتنه دا ده چې په بیو کې توپير راشي، نرخ راټیټ شي، غوړي ارزانه شي اوړه ارزانه شي، ستونزه په ډالر کې نشته، موږ بېوزلو خلکو ته ډالر مهم نهدی.»
هټۍوال عبدالکریم هم وايي:«مخکې ډالر ۱۳۰ کې وو یعنې ۱۰۳۰۰ وو اوس په ۶۶۰۰ دي، دا ګټه شوه او که تاوان شو؟ مخکې یوه بوجۍ وریجې په ۳۵۰۰ افغانیو وه اوس په ۲۲۰۰ ده.»
دا په داسې حال کې ده، چې په وروستیو څو میاشتو کې د سیمې په هېوادونو او د افغانستان په ګاونډیو هېوادونو په تېره بیا پاکستان او ایران کې د ډالرو ارزښت لوړ شوی دی.
په دې اړه مو اندونه