فضل‌احمد معنوی، وزیر عدلیه امروز (دوشنبه، ۴ حوت) می‌گوید که برگرداندن زمین‌های غصب شدۀ دولتی، یکی از هدف‌های بنیادین حکومت جمهوری اسلامی افغانستان است و از برنامه‌ها برای عملی شدن این کار اطمینان می‌دهد.

او در نشست که به هدف چه‌گونه‌گی برگردانیدن زمین‌های عضب شدۀ دولتی و عامه بر گذار شده بود، می‌گوید: "هر جا اگر تشخیص شد که ملکیت عامه و یا دولتی در تصرف غیر قرار گرفته‌است، فوراً اقدام به‌دست آوردن آن نمی‌کنند، نهادی مشخص شده‌است تا در محکمه دعوا بکند و دلایل ارایه بکند تا نشود که مثل حکومت‌های سخت‌گیر حق مردم ضایع شود."

بر بنیاد آمارهای وزارت شهر سازی و اراضی کشور، یک میلیون و ۶۰۰ هزار جریب زمین دولتی غصب شده‌است و آمارهای این وزارت مشخص می‌سازد که در غصب زمین‌های دولتی، ۱۸ هزار تن دخیل هستند.

از سوی دیگر، محمود کرزی، وزیر شهر سازی و اراضی نیز می‌گوید که هر کسی در افغانستان به هدف سرمایه‌گزاری نیاز به زمین داشته باشد، او آماده‌است که برای بهبود اوضاع اقتصادی کشور برایش زمین بدهد.

او افزود: "هر کسی که در افغانستان در هر بخش می‌خواهد زمین به‌دست بیاورند که فعالیت اقتصادی بکند، من برایش می‌دهم."

غلام حیدر علامه، معاون لوی سارنوالی برگردانیده شدن زمین‌های غصب شدۀ دولتی و عامه را به قدرت‌مند شدن حکومت نیز پیوند می‌دهد.

او افزود: "اگر منافع دولت و سرمایه‌های عمومی کشور حفاظت شود، دولت قدرمت‌مند تر می‌شود."