عطاالرحمان سلیم، معاون شورای عالی مصالحۀ ملی که در نشست مشترک عالمان دین افغانستان و پاکستان شرکت کرده بود، می‌گوید بیشتر عالمان دینی پاکستان که در این نشست شرکت کرده بودند، جنگ را در افغانستان حرام شمردند.
این نشست به‌روز پنج‌شنبه (۲۱جوزا) در ریاض، پایتخت عربستان سعودی برگزار شد و عالمان دینی دربارۀ جنگ و صلح افغانستان رأی‌زنی کردند. معاون شورای عالی مصالحۀ ملی می‌گوید که این نشست پس از تلاش‌های دوسالۀ ملی منطقه‌یی و جهانی برگزار شد.
آقای سلیم می‌گوید که بزرگ‌ترین و پرنفوذترین عالمان دینی پاکستان؛ چون مولوی عبدالمالک، مولوی جال اندری، مفتی تقی عثمانی، معاون دارالعلوم پاکستان، مولانا نعیمی، مولانا قادری‌که هریک هزاران مدرسه دینی را در پاکستان رهبری می‌کنند در این نشست حضور داشتند: «مولانا صاحب جال اندری صحبت کرد در آنجا، که رییس اتفاق المدارس عربی پاکستان استند، که بیشتر از سه هزار مدرسه دینی زبده مربوط به مکتب فکر دیوبندی در آنجا درس می‌خوانند.»
به‌گفتۀ آقای سلیم عالمانی در نشست روز پنج‌شنبه شرکت کرده بودند که سال‌ها رهبران و فرماندهان طالبان را تدریس کرده‌اند: «ما در گذشته زیاد تلاش کردیم. دو سال قبل رفتیم آنجا حتا همین علمایی‌که دیروز صحبت می‌کردند، آماده نبودند که با ما در حضورداشت مطبوعات صحبت بکنند؛ بنابر ملحوظاتی که داشتند.»
در همین حال، شماری از سیاست‌‌گران در کشور می‌گویند که آنان می‌کوشند تا راهکار مشخصی برای ادامۀ گفت‌وگوها میان عالمان دینی پاکستان و افغانستان روی دست گیرند.
کریم خلیلی، معاون پیشین رییس‌جمهور گفت: «علمای پاکستان، علمای افغانستان با همکاری کشور سعودی جلسه داشتند و این‌کار نیک است و آن‌ها به حرام جنگ فتوا دادند.»
به‌دنبال نشست عالمان دینی افغانستان و پاکستان، امام مکه در خطبه نماز جمعه خواهان قطع جنگ و تأمین صلح در افغانستان شد.