د طالبانو او امریکا ترمنځ د دوحې هوکړې له څلور کلن کېدو سره هممهاله، د امریکا بهرنیو چارو وزارت وايي، دغې هوکړې په افغانستان کې طالبان پیاوړي کړل.
د امریکا د بهرنیو چارو وزارت د ویاند په باور، دغې هوکړې بیا د امریکا شریکان کمزوري کړي دي او اسلامي امارت تورونوي چې د دوحې هوکړه یې نقض کړې ده.
د امریکا د بهرنیو چارو وزارت ویاند، مېتیو مېلر و ویل: «نو زموږ په نظر، دغې هوکړې طالبان پیاوړي کړل، په افغان حکومت کې یې زموږ شریکان کمزوري کړل او امریکا یې دې ته ژمنه کړه چې د راتلونکي لپاره له کوم څرګند پلان پرته خپل ځواکونه وباسي. طالبانو د دوحې په هوکړه کې پر خپلو ژمنو عمل نه دی کړی.په داسې حال کې چې دوی په افغانستان کې د ځینو ترهګرو ډلو پر ضد عملیات کړي، دا ښه معلومه ده چې طالبانو هم په کابل کې د القاعدې مشر الظواهري ته پټنځای ورکړی، چې دا کار په مستقیمه توګه له هوکړې سره په ټکر کې دی.»
له ترهګرو ډلو سره مبارزه، له افغانستانه د بهرنیو ځواکونو بشپړ وتل، د افغانانو ترمنځ د خبرو پیل، دایمي اوربند او د امریکا پر ضد د افغانستان له خاورې کار نه اخیستل د دغې هوکړې مهمې برخې بللې شوې وې.
د نړۍوالو چارو شنونکی نجیب الرحمن شمال په دې اړه داسې وایي: « بین الافغاني خبرې پیل شوې خو ستونزې حل نه شوې. د افغانستان هوایي حریم لا هم د امریکا په لاس کې دی.»
خو اسلامي امارت بیا د دوحې هوکړه یوه سیاسي لاس ته راوړنه بولي.
د اسلامي امارت مرستیال ویاند وايي، د دغې هوکړې له مخې بهرني ځواکونه له هېواده ووتل او په هېواد کې د اسلامي نظام د جوړېدو زمینه برابره شوه.
د اسلامي امارت د ویاند مرستیال حمدالله فطرت طلوع نیوز ته و ویل: «د دوحې هوکړه لیک د اسلامي امارت بریا وه چې له هغه سره نه یوازې د اشغال ټغر ورټول شو بلکې بهرني ځواکونه هم له افغانستانه ووتل او هېواد کې د پیاوړي اسلامي نظام ټینګښت ته لار هواره شوه.»
د اسلامي امارت د بهرنیو چارو سرپرست وزیر، امیرخان متقي بیا له طلوع نیوز سره په ځانګړې مرکه کې ویلي، اسلامي امارت د دوحې هوکړه لیک ته ژمن دی او عمل یې پرې کړی خو امریکا بیا له دغې هوکړې څه باندې ۱۷ سوه سرغړونې کړې دي.
په دې اړه مو اندونه