کابل او ننګرهار کې چاودنو پنځه تنه چې څلور یې سیمه ییز پولیس دي ټپیان کړل.
د ننګرهار ولایت سیمهییز مسوولین نن(دوشنبې د مرغومې په ۱۵مه نېټه) د جلال اباد ښار څلورمې ناحیې اړونده سیمه کې د چپرهار ولسوالۍ د سیمهییزو پوليسو پر موټر چاودنه تاییدوي او وايي چې د پېښې له ځايه څلور ټپيان روغتون ته لېږدول شوي دي.
مخکې له دې ننګرهار کې يوې امنیتي سرچینې ویلي و چې له چاودنې وروسته په سیمه کې د ډزو غږ هم اورېدل شوی دی.
په همدې حال کې نن سهار کابل کې د امنیتي ځواکونو پر موټر چاودنې یو کس ټپي کړ.
د کابل پولیس پېښه تاییدوي او وايي چې چاودنه د کابل اتمې ناحیې په کارته نو سیمه کې شوې ده.
د دواړو پېښو مسوولیت تر اوسه چا نه دی منلی.