د کابل پولیسو نن دوشنبې (د وري په ۱۶مه) په یوې خبرپاڼه کې وايي چې د کابل په قره باغ ولسوالۍ کې د ملي پوځ پر یوه موټر ماین چاودنه کړې چې په پایله کې یې د ملي پوځ یو سرتېری وژل شوی او څلور تنه نور ټپيان شوي دي.
خبرپاڼه همدارنګه زیاتوي چې دغه پېښه نن سهار اووه بجې د قره باغ ولسوالۍ په سبزسنګ سیمه کې رامنځته شوې ده.
په خبرپاڼه کې ویل شوي دي چې د پېښې له سیمې یو کړۍ بل ماین هم د امنیتي ځواکونو له خوا کشف او شنډ کړل شوی دی.
تراوسه د طالبانو په ګډون هېچا د دغې پېښې مسوولیت نه دی منلی.
تېره ورځ هم د کابل په پغمان ولسوالۍ کې د موټر بم چاودنه کې درې پوځيان ووژل شول او ولسي وګړو په ګډون دولس تنه نور ټپيان شول.