د کډوالو او راستنېدونکو چارو وزارت وايي چې د افغان کډوالو د ستونزو د حل په موخه ډېر ژر به، د سرپرست حکومت یو پلاوی ترکیې ته سفر وکړي.
د کډوالو او راستنېدونکو چارو وزارت سرپرست په افغانستان کې د ترکيې له نوي سفیر سره په لیدنه کې له هغه غوښتي، چې د افغان کډوالو د جبري ویستلو پر ځای دې د دوی لپاره د کار زمینه برابره کړي.
د کډوالو او راستنېدونکو چارو وزارت ویاند عبدالمطلب حقاني وايي:«د کډوالو او راستنېدونکو چارو وزارت سرپرست په افغانستان کې د ترکيې له سفیر سره په لیدنه کې په دغه هېواد کې د افغان کډوالو پر ستونزو خبرې وکړي او دغه راز په پام کې ده چې په نږدې وخت کې افغان پلاوی د کډوالو ستونزو د حل لپاره ترکيې ته لاړ شي.»
د وزارت ویاند همداراز زیاتوي، خلیل الرحمن حقاني په افغانستان کې د ترکيې له سفیر سره په لیدنه کې ویلي، چې د کډوالو د ستونزو د حل لپاره دې په ترکیه کې د کډوالو اتشو ته اجازه ورکړل شي.
ورته مهال ځينې افغان کډوال نیوکه کوي، چې د ترکيې، ایران او پاکستان د پولیسو له لوري ځورول کېږي.
کډوال فیصل نظامي وویل:«په دې وروستیو کې ترکیه کې د افغان کډوالو پر وړاندې ستونزې ډېرې شوي، چې یوه له ډېرو جدي ستونزو دلته د افغانانو نیول کېدل او د پولیسو له لوري ځورونه ده، چې باید دا لړۍ بنده شي.»
بل کډوال علي حسیني هم څرګندوي:«کله چې د پاکستان حکومت د کډوالو لپاره ضرب الاجل وټاکه له هغې وروسته د افغان کډوالو ځورونه زیاته شوي چې اوسمهال په ډېر بد وضعیت کې د ژوند شپي او ورځې تېروي.»
دا په داسې حال کې ده چې د ناقانونه کډوالو د ویستلو لپاره د پاکستان د لنډمهاله حکومت د ضرب الاجل پای ته نږدې دوه اوونۍ پاتي دي؛ خو د کډوالو د حقونو ځیني فعالان ټینګار کوي چې پاکستان باید په دې اړه له سره غور وکړي.
په پاکستان کې د کډوالو د شورا مشر میر احمد رووفي وویل:«افغان حکومت باید لاس په کار شي او هغه ستونزې چې د دواړو هېوادونو ترمنځ موجودي دي هوارې کړي، ترڅو پر کډوالو شته فشارونه کم شي.»
په ایران کې د کډوالو د حقونو فعال محمد خان طالبي محمدزی هم زیاتوي:«په ایران کې له افغان کډوالو سره ښه چلند نهکېږي او هغه وخت دوی د ټلېفون سیمکارت اخیستلی شي چې کله قانوني اسناد ترلاسه کړي.»
د کډوالو او راستنېدونکو چارو وزارت د شمېرو له مخې، د تلې میاشتې په ۲۴مه نېټه څه باندې ۳۰۰۰ کسان له ایرانه په جبري او داوطلبانه توګه او څه باندې ۵۰۰ کورنۍ له پاکستانه، هېواد ته راستانې شوې دي.
په دې اړه مو اندونه