په ننګرهار کې امنیتي پوځيان وايي چې د دغه ولایت په سرحدي سیمو د پاکستاني پوځيانو توغندويي او توپخانهيي بریدونو د یوه ولسي وګړي ژوند واخیست او دوه تنه نور یې ټپيان کړل.
په تورخم کې پولهساتي ځواکونه وايي چې د جمعې په ماښام د پاکستاني پوځيانو بریدونه د تورخم په ښارګوټي پیل او څو ساعتونه یې دوام درلود.
د پولهساتو ځواکونو د لومړی لوا درستیزوال نور جهان وايي:« پاکستان ترهګر روزي، د ترهګرو اډې هلته دي دا ټولې دنیا ته مالومه ده، مونږ نه ترهګر روزو او نه دا کار کوو. موږ د سر په بیه له خپل وطن څخه دفاع کوو، قربانۍ مو ورکړي او بیا به یې هم ورکړو.»
د ننګرهار د ځايي چارواکو په وینا په دغو بریدونو سوداګرو ته هم زښت زیات زیانونه رسېدلي او څو باروړنکي موټر هم سوځول شوي دي.
په همدې حال کې د پاکستاني پوځيانو د توغندويي او توپخانهيي بریدونو د پيل شاهد او چلوونکی سرفراز وايي چې دغه برید د څو ساعتونو لپاره دوام درلود.
هغه وویل:«اوه بجې به وې چې مرمۍ شروع شوې، اول هغه پورته د غونډۍ سره ولګېد، بیا بله مرمۍ راغله په دې موټر ولګېده چې یو چلوونکی پهکې شهید شو.»
تورخم ته نږدې پرتو سیمو کې مېشت خلک د پاکستاني پوځیانو توغندیو او مرمیو ورولو تنګ کړي او له حکومته غواړي چې باید مخه یې ونېسي.
د ننګرهار د مهمند درې ولسوالۍ اوسېدونکي جمعه ګل څرګنده کړه:« موږ نور په تنګ شوي یوو، حکومت هېڅ هم نه کوي دا مرمۍ هر وخت همدغسې راروانې وي؛ خو څه نه کېږي،. موږ مجبور یو خپله د پاکستان خلاف پورته شو او ځواب یې ورکړو.»
بلخوا په ختیځ کې د پولهساتو ځواکونو مسؤولین هم د پاکستاني پوځیانو توغندي مني او د نړیوالو اصولو خلاف کړنه یې بولي او پاکستان د ترهګرو ملاتړی هېواد بولي.
دا بریدونه په داسې وخت کې کېږي چې د جمعې پر ورځ پاکستاني پوځیانو د کندهار په سپین بولدک کې مرمۍ ورولې وې چې د افغان ځواکونو په ځوابیه برید کې پاکستاني لوري تدرنه مرګ ژوبله ولیده.