د ولسمشر له خوا د بلخ لیرې کړل شوی والي عطامحمد نور یو وار بیا حکومت ته ګواښ کوي کهچېرې له هغه سره هوکړې ته ونه رسېږي جدي لارې به غوره کړي.
ښاغلی نور چې نن له غرمې وروسته په مزارشریف کې د خپلو پلویانو په منځ کې خبرې کولې، ملي یوالي حکومت یې د هوکړې پر بنسټ مصلحتي حکومت او د اساسي قانون پر خلاف وباله.
هغه زیاته کړه:«هغه زرغون حرکت چې له تاسو مې وغوښت، هغه دی چې جوپه جوپه واټونو ته ووځو او خپلې غوښتنې وغواړو؛ کهچېرې اورېدونکي غوږونه وي او ستونزه حل شوه، ښه؛ کهچېرې نهشوه، نارنجي حرکتونو ته مخه کوو؛ دا کوم خوځښت دی؟ همدا ډول ډلې ډلې واټونو ته راوځو او په ټولو ولایتونو کې دولتي ادارې بندوو.»
عطامحمد نور وایي، که ولسمشر په خپلو خبرو ریښتنی دی باید د جمعیت او حکومت ترمنځ د هوکړې متن لاسلیک کړي.
نوموړی زیاتوي په کابل کې د امریکا سفیر باید یو ځل بیا د افغانستان اساسي قانون ولولي.
عطا محمد نور زیاته کړه:«دا حکومت، توافقي حکومت دی، د یوه هېواد سفیر په افغانستان کې د قانون خبره وکړه، که څه هم موږ د امریکا د ولسمشر د مرستیال مایک پنس پر دریځ توسل کوو، زموږ لپاره معیار او ریښتینوالي هغه دی چې له سپینې ماڼۍ غږ پورته شوی او له هغه مو هرکلی هم کړی. شونې ده چې ارګ له ډېرې زارۍ سره، سفیر یې چمتو کړی وي چې ځينې خبرې وکړي، خو زه ورته وایم چې لومړی یو ځل د افغانستان اساسي قانون ولوله، د افغانستان شرایط درک کړه.»
ښاغلی نور زیاتوي چې اسلامي جمعیت د ملي یووالي حکومت یو لوری دی نو له همدې امله د ده استعفا د ولسمشر او اجراییه رییس له استعفا سره برابره ده.
هغه څرګندوي:«کهچېرې زما پر استعفا، د جمعیت د مشرتابه او زموږ د متحدانو څخه پرته تایید وشي، زما استعفا په نېته توګه د ولسمشر او اجراییه رییس له استعفا سره اړیکه نیسي؛ درې واړه بیا یو ځای استعفا ورکوو.»
د ولسمشرۍ ماڼۍ او د استازو غبرګون
د دغو شخړو له دوام سره جوخت، په ولسي جرګه کې د خلکو استازي، د دغه بهیر له منفي پایلو ګواښ کوي.
د ولسي جرګې دویم مرستیال نذیر احمد احمدزی وايي کهچېرې وضعیت په همدې ډول دوام پيدا کړي، نه یوازې په هېواد کې ترهګرو ته زمینه برابرېږي بلکې د خلکو پر ژوند او کار هم اغېزه کوي.
له دې ټولو سره، د ښاغلي نور له ګوښه کېدو وروسته، د چارو ادارې مرستیال، هارون چخانسوري یوازینی حکومتي کس دی چې په دې اړه خبرې کوي.
هغه نن له غرمې وروسته په کابل کې خبرې غونډې ته وویل:«د ښاغلي نور موضوع، یوه کوچنۍ کورنۍ موضوع ده او ډېر ژر به حل شي.»
عطامحمد نور وايي، د ملي یووالي حکومت د محصلتي هوکړې پر بنسټ رامنځته شوی او زیاتوي چې په هېواد کې د ملي یووالي حکومت جوړښت د اساسي قانون پر خلاف دی.