د کابل ښار یو شمېر اوسېدونکي چې د قرغې بند په شاوخوا کې ژوند کوي، وايي، خوښ دي چې پهدې بند کې اوبه یو ځل بیا زیاتې شوې دي.
د دوی په خبره، په دغه بند کې د اوبو کمښت دغه بند ته د سیلانیانو د ورتګ د کمه رنګه کېدو لامل شوی وو.
دوه څلوېښت کلن ملک محمد شاوخوا دولس کاله کېږي چې د قرغې په بند کې کښتۍ چلوي، وايي، د قرغې بند د اوبو کمېدو دغه بند ته د ورتلونکو کسانو شمېر کم کړی و، خو اوس د قرغې بند د اوبو زیاتېدو ته خوښ دی.
ملک محمد طلوعنیوز ته وايي: «ډېر خوښ یم چې د قرغې اوبه ډېرې شوي او د الله کار دی چې بارانونه ډېر شي او له هېواده وچکالي ورکه شي.»
د هوټلونو د تصدۍ ریاست استازی فضلي احمد وايي: «یوه میاشت وشوه چې اوبه ډېرې شوې دي، د خلکو تګ-راتګ هم ډېر شوی دی، د همدې لپاره خلک چکر ته راځي، هوټلونو هم په فعالیت پیل کړی دی.»
دې تفریحي سیمې ته ورتلونکي کسان هم پهدې بند کې د اوبو ډېروالي ته خوشبین دي.
قرغې بند ته راغلی کس رحیمالله وايي: «په قرغه کې اوبه دي چې خلک ورته راځي، سږ کال د خدای فضل دی، روښاني شته، باران شوی دی او اوبه هم په ډېرېدو دي.»
بلپلو، د اوبو او انرژۍ وزارت وایي، د سږکال ورښتونه د تېر کال پرتله ۴۶ سلنه زیات شوي دي.
د کابل د سیندیزې حوزې عمومي رییس حبیب الرحمن حقپال وايي: «د تېر کال پرتله سږ کال بارانونه ډېر شوي، نږدې ۴۶ سلنه ډېر شوي او انشاء الله سږ کال به د اوبو د کمښت ستونزه هم تر ډېره بریده حل شي.»
په وروستیو میاشتو کې د هېواد بېلابېلې سیمې د اقلیمي بدلونونو له امله د بارانونو د ورېدو او د سیلابونو د راتلو شاهدې وي، چې دغه ورښتونو د تېرو کلونو پرتله زیات وو.
په دې اړه مو اندونه