په دوحه کې د افغانستان لپاره د امریکا د سفارت شارژدافېره کرن ډېکر له طلوعنیوز سره په مرکه کې وايي چې هېواد یې د اسلامي امارت د رسمیت پېژندلو لپاره مشخص بهیر نهلري.
اغلې ډېکرزیاتوي چې دوی ته د افغانانو غوښتنه مهمه ده او افغان ولس باید داسې واکمنان پیدا کړي چې د هغوی استازیتوب وکړای شي.
نوموړې دغه راز له افغانانو سره د امریکا د اړیکو پر پیاوړتیا ټينګار کوي.
د افغانستان لپاره د امریکا د سفارت شارژدافېره طلوعنیوز ته وايي:«د امریکا متحده ایالتونو لپاره په رسمیت پېژندنه یوه معین پروسه نهده، زه د افغانانو یوې داسې اشارې په تمه یم چې هغوی وکړای شي داسې واکمنان پیدا کړي چې په قانوني توګه د هغوی استازیتوب وکړای شي. زموږ لپاره د افغانانو غوښتنه لومړیتوب لري.»
مېرمن ډېکر د خپلو خبرو په یوه برخه کې په افغانستان کې د ښځو پر روان وضعیت په نیوکې سره وايي چې دا وضعیت د منلو نهدی.
هغه دغه راز د دوحې په غونډه کې د افغان ښځو د مسئلې شاملول هم مهم بولي.
د افغانستان لپاره د امریکا د سفارت شارژدافېره کرن ډېګر زیاتوي:«دا وحشتناکه ده، اړتیا نشته چې زه دا تاسو ته ووایم. زه فکر کوم چې موږ باید د دې په تړاو ريښتوني واوسو چې افغان ښځې نهشي کولای کار وکړي، افغان نجونې نهشي کولای زدهکړې وکړي، او دا د منلو وړ نهده. افغانستان په نړۍ کې یوازينی هېواد دی، نجونو ته اجازه نهورکوي چې ښوونځي ته لاړې شي.»
خو د ښځو د حقونو یوه فعاله د افغانستان د ښځو پر وړاندې د نړۍوالې ټولنې پر بې غورۍ نیوکه کوي او وايي د افغانستان په تړاو غونډې تر هغو چې د پاموړ پایله ونه لري، کافي نهدي.
د ښځو د حقونو فعاله عالمتاب رسولي په دې هکله وايي:«غونډې که څه هم زیاتې وې؛ خو زما په اند، د اسلامي امارت حکومت، ښځې او نجونې چې په هکله یې خبرې کېږي د غایب په توګه دي؛ یعنې د اسلامي امارت حکومت، ښځې او نجونې د دغو غونډو اصلي برخې دي، په دغو غونډو کې حضور نهلري.»
د افغانستان لپاره د امریکا شارژدافېره دغه راز د خپلو خبرو په یوه برخه کې طالبانو ته د ۴۰ مېلیون ډالرو مستقیمې مرستې استول ردوي؛ خو زیاتوي چې دا پیسې ملګرو ملتونو ته لېږل کېږي.
په دې اړه مو اندونه